ប្រមុខការពារជាតិអាមេរិក លោក Jim Mattis បានធ្វើដំណើរទៅដល់ប្រទេសអាហ្វហ្កានីស្ថានហើយ នៅក្នុងដំណើរទស្សនកិច្ចមិនត្រូវបានប្រកាសឲ្យដឹងមួយ នៅថ្ងៃនេះ ប៉ុន្មានម៉ោងក្រោយពីប្រមុខការពារជាតិអាហ្វហ្កានីស្ថាន បានលាលែងពីតំណែង ជុំវិញការវាយប្រហារដ៏បង្ហូរឈាម ដែលជំរុញឲ្យមានកំហឹង និងបណ្ដាលឲ្យទឹកចិត្តកងទ័ពធ្លាក់ចុះ។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន AFP។
លោក Mattis បានហៅក្រុមឧទ្ទាមតាលីបង់ជា “ពួកព្រៃ” ប៉ុន្តែ លោកបែរជាមិនទោរទន់ទៅតាមការអំពាវនាវនាពេលថ្មីៗនេះ ឲ្យបញ្ជូនទ័ពបន្ថែមទៀត ទៅជួយប្រយុទ្ធប្រឆាំងនឹងពួកបះបោរនោះឡើយ។
លោក Mattis បានធ្វើដំណើរទៅដល់ទីនោះ ខណៈដែលកងកម្លាំងអាហ្វាហ្កានីស្ថានកំពុងប្រឈមមុខនឹងភាពវឹកវរ ដោយសារតែការលាលែងពីតំណែងរបស់រដ្ឋមន្ត្រីការពារជាតិ លោក អាប់ដុលឡាហ្វ ហាប៊ីប៊ី និងប្រមុខកងទ័ព លោក ហ្កាដាម ហ្សាហ្វ ហ្សាហ៊ីម។
ការលាលែងពីតំណែងរបស់ពួកគេ បានកើតឡើងក្រោយពីមានការវាយប្រហារយ៉ាងរង្គាល់ពីសំណាក់ពួកឧទ្ទាមតាលីបង់ ទៅលើមូលដ្ឋានកងទ័ពអាហ្វហ្កានីស្ថាន ស្ថិតនៅទីក្រុងម៉ាហ្សាអ៊ីហ្សារីហ្វ ភាគខាងជើងប្រទេស៕
