អធិការបតីអាល្លឺម៉ង់ អ្នកស្រី អែនជឺឡា មឺកែល នៅថ្ងៃនេះ គ្រោងជួបពិភាក្សាជាមួយប្រធានាធិបតីរុស្ស៊ី លោក វ៉្លាឌីមៀ ពូទីន នៅទីក្រុងលម្អែកាយស៊ូឈី ស្ថិតនៅសមុទ្រខ្មៅ នៅក្នុងដំណើរទស្សនកិច្ចជាលើកដំបូងរបស់អ្នកស្រី ទៅកាន់ប្រទេសរុស្ស៊ី ចាប់តាំងពីឆ្នាំ២០១៥មក ដែលជាសញ្ញានៃការពិនិត្យមើលឡើងវិញនូវជំនួបពិភាក្សារវាងក្រុងប៊ែរឡាំង និងក្រុងមូស្គូ។ នេះដោយតាមការចុះផ្សាយរបស់ទីភ្នាក់ងារព័ត៌មាន AFP។
ទំនាក់ទំនងមេដឹកនាំរុស្ស៊ី និងអាល្លឺម៉ង់ បានឈានដល់ចំណុចកំពូល ខណៈដែលទំនាក់ទំនងរវាហក្រុងមូស្គូជាមួយសហភាពអឺរ៉ុប បានធ្លាក់ចុះដល់កម្រិតទាបបំផុត នៅក្រោយសង្គ្រាមត្រជាក់។
អ្នកស្រី មឺកែល បានគាំទ្រយ៉ាងក្លៀវក្លាចំពោះទណ្ឌកម្មរបស់អឺរ៉ុបទៅលើក្រុងមូស្គូ ដែលបានដណ្ដើមកាន់កាប់ទឹកដីគ្រីមៀរពីប្រទេសអ៊ុយក្រែន នៅឆ្នាំ២០១៤ ព្រមទាំងបានគាំទ្រពួកបះបោរផ្ដាច់ខ្លួនស្និទ្ធនឹងរុស្ស៊ី នៅភាគខាងកើតប្រទេសអ៊ុយក្រែនថែមទៀត។
ក្រុងមូស្គូបានសងសឹកនឹងសហភាពអឺរ៉ុបវិញ តាមរយៈការហាមឃាត់ការនាំចូលផលិតផលកសិកម្មពីអឺរ៉ុបខាងលិច។
ក្នុងដំណើរទស្សនកិច្ចផ្លូវការលើកដំបូងរបស់អ្នកស្រី ទៅកាន់រុស្ស៊ីកាលពីសប្ដាហ៍មុន ប្រមុខការបរទេសសហភាពអឺរ៉ុប អ្នកស្រី ហ្វីដេរីកា ម័រហ្គ័រីនី បានអះអាងថា កិច្ចសហការប្រតិបត្តិការរវាងភាគីទាំងពីរ មិនបានជាប់គាំងនោះឡើយ ប៉ុន្តែ អ្នកស្រីថា ភាពរីកចម្រើននោះ បានរងផលប៉ះពាល់ដោយសារការខ្វែងគំនិតគ្នាទៅលើបញ្ហានានា ក្នុងនោះមានទាំងប្រទេសអ៊ុយក្រែន និងស៊ីរីផងដែរ។
ដំណើរទស្សនកិច្ចរបស់អ្នកស្រី មឺកែល ទៅកាន់ប្រទេសរុស្ស៊ី បានកើតឡើងក្រោយពីលោក ពូទីន បានអំពាវនាវឲ្យជំរុញទំនាក់ទំនងរវាងប្រទេសទាំងពីរឈានដល់កម្រិត “ធម្មតាពេញលេញ” អំឡុងជំនួបជាមួយរដ្ឋមន្ត្រីការបរទេសអាល្លឺម៉ង់ លោក Sigmar Gabrial កាលពីខែមីនាកន្លងមក៕