កូរ៉េខាងជើង នៅថ្ងៃនេះ បានចោទអាមេរិកថា បានជំរុញឧបទ្វីបកូរ៉េឲ្យធ្លាក់ទៅរកសង្គ្រាមនុយក្លេអ៊ែរ បន្ទាប់ពីយន្តហោះទម្លាក់គ្រាប់បែកមួយរបស់អាមេរិក បានហោះហើរនៅក្នុងសមយុទ្ធយោធាជាមួយកងទ័ពអាកាសកូរ៉េខាងត្បូង និងជប៉ុន ក្នុងលក្ខណៈជាការបង្ហាញសាច់ដុំ។ នេះដោយយោងតាមចុះផ្សាយរបស់ទីភ្នាក់ងារព័ត៌មាន Reuters។
យន្តហោះទម្លាក់គ្រាប់បែកល្បឿនលឿន B-1B ចំនួន ២គ្រឿង ត្រូវបានគេដាក់ពង្រាយចំពេលដែលមានភាពតានតឹងកាន់តែខ្លាំង ជុំវិញកម្មវិធីនុយក្លេអ៊ែរ និងគ្រាប់មីស៊ីលរបស់កូរ៉េខាងជើង ដែលល្មើសទៅនឹងទណ្ឌកម្មអង្គការសហប្រជាជាតិ និងរងសម្ពាធពីអាមេរិក។
ការហោះហើររបស់យន្តហោះទម្លាក់គ្រាប់បែកទាំងពីរនៅថ្ងៃនេះ បានកើតឡើងចំពេលដែលប្រធានាធិបតីអាមេរិកនិយាយថា លោកបើកចំហរចំពោះការជួបជាមួយមេដឹកនាំកូរ៉េខាងជើង លោក គីម ជុងអ៊ុន នៅក្នុងកាលៈទេសៈត្រឹមត្រូវ និងខណៈដែលនាយកទីភ្នាក់ងារចារកម្មអាមេរិក បានធ្វើដំណើរទៅកូរ៉េខាងត្បូង។
អ្នកនាំពាក្យក្រសួងការពារជាតិកូរ៉េខាងត្បូង លោក មូន សាងឃ្យុន បានថ្លែងក្នុងសន្និសីទកាសែតដ៏ខ្លីមួយនៅទីក្រុងសេអ៊ូលថា សមយុទ្ធយោធារួមគ្នានៅថ្ងៃនេះ ត្រូវបានធ្វើឡើងដើម្បីទប់ស្កាត់ទង្វើបង្កហេតុរបស់កូរ៉េខាងជើង និងដើម្បីសាកល្បងភាពប្រុងប្រយ័ត្នប្រឆាំងនឹងការសាកល្បងគ្រាប់បែកនុយក្លេអ៊ែរណាមួយ។
កងទ័ពអាមេរិកបាននិយាយនៅក្នុងសេចក្ដីប្រកាសព័ត៌មានមួយថា យន្តហោះទម្លាក់គ្រាប់បែកនោះ បានហោះហើរពីកោះ Guam ដើម្បីចូលរួមសមយុទ្ធជាមួយកងទ័ពអាកាសកូរ៉េខាងត្បូង និងជប៉ុន។
កូរ៉េខាងជើង បានប្រតិកម្មថា យន្តហោះទម្លាក់គ្រាប់បែកនោះ បានធ្វើសមយុទ្ធទម្លាក់គ្រាប់បែកនុយក្លេអ៊ែរទៅលើវត្ថុដ៏ធំមួយ នៅក្នុងទឹកដីរបស់ខ្លួន នៅចំពេលមួយដែលលោក ត្រាំ និងឈ្មួញសង្គ្រាមអាមេរិកដទៃទៀត កំពុងតែស្រែកពន្យុះឲ្យធ្វើការវាយប្រហារបង្ការខ្លួនទៅលើកូរ៉េខាងជើង៕