ប្រព័ន្ធការពារមីស៊ីលដ៏ចម្រូងចម្រាស់របស់អាមេរិក ដែលបានធ្វើឲ្យចិនខឹងសម្បារនោះ ពេលនេះ ត្រូវបានមន្ត្រីក្រសួងការពារជាតិអាមេរិកអះអាងថា កំពុងស្ថិតក្នុងដំណើរការនៅកូរ៉េខាងត្បូងហើយ។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន AFP។
ក្រុងវ៉ាស៊ីងតោន និងក្រុងសេអ៊ូល បានឯកភាពដាក់ពង្រាយខែលការពារមីស៊ីល THAAD កាលពីខែកក្កដាឆ្នាំមុន នៅចំពោះមុខនៃការបាញ់សាកល្បងគ្រាប់មីស៊ីលជាច្រើនលើករបស់កូរ៉េខាងជើង។
មន្ត្រីការពារជាតិអាមេរិក ដែលបានថ្លែងក្នុងលក្ខខណ្ឌមិនបញ្ចេញឈ្មោះ បាននិយាយថា វាឈានដល់លទ្ធភាពអាចទប់ស្កាត់ថ្នាក់បឋមហើយ។
មន្ត្រីដដែលនោះ បន្ថែមថា លទ្ធភាពស្កាត់ចាប់គ្រាប់មីស៊ីលកម្រិតបឋមនេះ នឹងត្រូវពង្រីកបន្ថែមទៀតនៅពេលក្រោយក្នុងឆ្នាំនេះ នៅពេលសម្ភារៈបំពាក់ដទៃទៀតត្រូវបានបញ្ជូនទៅដល់ទីនោះ។
ការដាក់ពង្រាយខែលការពារមីស៊ីលនៅកូរ៉េខាងត្បូងនេះ បានធ្វើឲ្យចិនផ្ទុះកំហឹង ដោយចិនព្រួយបារម្ភថា វានឹងធ្វើឲ្យសមត្ថភាពគ្រាប់មីស៊ីលរបស់ខ្លួនចុះខ្សោយ និងប៉ះពាល់ដល់តុល្យភាពសន្តិសុខតំបន់៕
