ក្រសួងការបរទេសអាមេរិក នៅថ្ងៃនេះ បានចេញសេចក្ដីព្រមានទៅដល់ប្រជាពលរដ្ឋរបស់ខ្លួនធ្វើដំណើរនៅអឺរ៉ុប ដោយថា ពួកគេគួរតែជ្រាបពីការបន្តគំរាមកំហែងនៃការវាយប្រហារពីក្រុមភេរវកម្មនៅទូទាំងតំបន់នេះ។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន Reuters។
ក្នុងសេចក្ដីជូនដំណឹងនោះ ក្រសួងការបរទេសអាមេរិកបានលើកយកករណីវាយប្រហារភេរវកម្មថ្មីៗនៅក្នុងប្រទេសបារាំង រុស្ស៊ី ស៊ុយអ៊ែត និងចក្រភពអង់គ្លេស ហើយនិយាយថា ក្រុមរដ្ឋឥស្លាម និងពួកអាល់កៃដា មានសមត្ថភាពអាចរៀបចំផែនការឲ្យក្រុមភេរវករវាយប្រហារនៅអឺរ៉ុប។
សេចក្ដីប្រកាសព្រមានទៅលើការធ្វើដំណើរកាលពីលើកមុនរបស់ក្រសួងការបរទេសអាមេរិក ដែលត្រូវបានផ្សព្វផ្សាយនៅមុនរដូវវិស្សមកាលនោះ បានផុតទៅហើយកាលពីខែកុម្ភៈកន្លងមក។
មន្ត្រីម្នាក់នៅក្រសួងការបរទេសអាមេរិក បាននិយាយថា សេចក្ដីប្រកាសព្រមាននេះ មិនមែនកើតចេញពីការគំរាមកំហែងជាក់លាក់មួយណានោះទេ ប៉ុន្តែ បានទទួលស្គាល់ពីការហានិភ័យនៃការវាយប្រហារ ជាពិសេសនៅមុនពេលឈប់សម្រាកក្នុងរដូវក្ដៅ។ សេចក្ដីប្រកាសព្រមានថ្មីនេះ នឹងផុតកំណត់ទៅនៅថ្ងៃទី០១ ខែកញ្ញាខាងមុខ។
ក្រសួងបាននិយាយថា ផ្សារទំនើប អគាររដ្ឋាភិបាល សណ្ឋាគារ ក្លឹបកម្សាន្ត ភោជនីយដ្ឋាន កន្លែងថ្វាយបង្គំ សួនឧទ្យាន ព្រលានយន្តហោះ និងទីតាំងដទៃទៀត សុទ្ធតែអាចជាគោលដៅនៃការវាយប្រហារ៕