ទិវាពលកម្មអន្តរជាតិ ០១ ឧសភា នៅប្រទេសបារាំង បានប្រែក្លាយទៅជាផ្ទុះអំពើហិង្សា និងបេក្ខជនប្រធានាធិបតីឈានមុខគេរបស់ប្រទេសបារាំង លោក អេម៉ានុយអែល ម៉ាក្រុន បានថ្លែងវាយប្រហារទៅលើបេក្ខនារីស្ដាំនិយមជ្រុល អ្នកស្រី ម៉ារីន ឡឺ ប៉ែន ដែលបង្ហាញពីការបែកបាក់គ្នា ៦ថ្ងៃមុនការបោះឆ្នោតប្រធានាធិបតីបារាំងវគ្គចុងក្រោយ។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន AFP។
ក្រុមមន្ត្រីប៉ូលិស ៦នាក់ បានរងរបួសនៅក្នុងការប៉ះទង្គិចនានារវាងក្រុមយុវជនពាក់ម៉ាស់មុខ ដែលបានគប់ដបភ្លើង និងប៉ូលិសប្រឆាំងបាតុកម្ម ដែលបានបាញ់ឧស្ម័នបង្ហូរទឹកភ្នែក ខណៈក្រុមសកម្មជនសហជីពរាប់ម៉ឺននាក់បានចុះផ្លូវធ្វើបាតុកម្មនៅចំទិវាពលកម្មអន្តរជាតិ។
រូបថតរបស់ទីភ្នាក់ងារព័ត៌មាន AFP បានបង្ហាញប៉ូលិសបង្ក្រាបបាតុកម្មម្នាក់ ត្រូវបានភ្លើងឆាបឆេះលើខ្លួន។
រដ្ឋមន្ត្រីមហាផ្ទៃបារាំង លោក ម៉ាត់ធីយ៉ាស់ ហ្វេក បានថ្កោលទោសចំពោះអំពើហិង្សានេះ និងបាននិយាយថា មន្ត្រីម្នាក់បានរងរបួសរលាកដៃធ្ងន់ធ្ងរ ខណៈដែលមន្ត្រីម្នាក់ទៀតរងរបួសរលាកមុខ។
ជាការប្រតិកម្មទៅនឹងទិដ្ឋភាពនោះ បេក្ខនារីប្រធានាធិបតីស្ដាំនិយមជ្រុល អ្នកស្រី ឡឺ ប៉ែន បានបង្ហោះសារថា វាគឺជាភាពរញ៉េរញ៉ៃ ដែលអ្នកស្រីមិនចង់ឃើញមាននៅលើដងផ្លូវទៀតនោះទេ។
ចំណែកលោក ម៉ាក្រុន វិញ បានប្រាប់ក្រុមអ្នកគាំទ្ររាប់ពាន់នាក់ថា លោកចង់ការពារប្រជាធិបតេយ្យសេរី ប្រសិនបើអ្នកបោះឆ្នោតជ្រើសរើសរូបលោកនៅថ្ងៃអាទិតចុងសប្ដាហ៍នេះ បន្ទាប់ពីអ្នកស្រី ឡឺ ប៉ែន ជំរុញទៅអ្នកបោះឆ្នោត កុំឲ្យចាត់ទុកពិភពហិរញ្ញវត្ថុ ភាពក្រអឺតក្រទូម និងពិភពលុយ ជាស្ដេចនោះឡើយ៕
