នាយករដ្ឋមន្ត្រីជប៉ុន លោក ហ្ស៊ិនហ្ស៊ូ អាបេ នៅថ្ងៃនេះ បានប្រកាសអំពីផែនការក្នុងការស្វែងរកការផ្លាស់ប្ដូរជាលើកដំបូងនូវរដ្ឋធម្មនុញ្ញសន្តិភាពនិយមរបស់ជប៉ុននៅក្រោយសង្គ្រាមលោកលើកទី២ និងបាននិយាយថា លោកចង់ការកែប្រែនេះចូលជាធរមាននៅឆ្នាំ២០២០ខាងមុខនេះ។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន AFP។
ការផ្លាស់ប្ដូរនេះ ដែលនឹងកែប្រែកម្លាំងកងទ័ពជប៉ុនពីកងទ័ពការពារខ្លួននោះ ត្រូវបានលោកប្រកាសឲ្យដឹង ខណៈដែលជប៉ុនប្រារព្ធខួប ៧០ឆ្នាំ នៃថ្ងៃកំណើតរដ្ឋធម្មនុញ្ញដែលសរសេរដោយសហរដ្ឋអាមេរិក ដែលជាអ្នកកាន់កាប់ប្រទេសជប៉ុន នៅក្រោយសង្គ្រាមលោកលើកទី២។
រដ្ឋធម្មនុញ្ញនេះ ដែលហាមឃាត់ជប៉ុនមិនឲ្យធ្វើសង្គ្រាមនោះ ត្រូវបានក្រុមកំណែទម្រង់ជប៉ុន ចាត់ទុកជានិមិត្តរូបនៃសន្តិភាពនិយម ដែលបានកើតឡើងនៅក្រោយពេលជប៉ុនប្រកាសចុះចាញសង្គ្រាមលោកលើកទី២។
ប៉ុន្តែ ក្រុមជាតិវិញ កំពុងជំរុញការផ្លាស់ប្ដូរ ដោយសារតែក្ដីបារម្ភកាន់តែខ្លាំងជុំវិញទង្វើអរិភាពបង្កឡើងដោយកូរ៉េខាងជើង។
លោក អាបេ ថ្លែងថា លោកមានបំណងកែប្រែរដ្ឋធម្មនុញ្ញនៅឆ្នាំ២០២០ នៅពេលដែលទីក្រុងតូក្យូនឹងត្រូវរៀបចំធ្វើជាម្ចាស់ផ្ទះការប្រកួតកីឡាអូឡាំពិករដូវក្ដៅ៕
