ប្រទេសចិន ត្រូវបានគេរំពឹងថានឹងសាកល្បងហោះហើរយន្តហោះដឹកអ្នកដំណើរមួយគ្រឿងដែលត្រូវបានផលិតឡើងនៅក្នុងស្រុក ដើម្បីឆ្លើយតបនឹងតម្រូវការជើងហោះហើរខ្ពស់នៅក្នុងប្រទេសចិន និងបញ្ហាប្រឈមនឹងការក្ដោបក្ដាប់របស់ក្រុមហ៊ុន Boeing និងក្រុមហ៊ុន Airbus។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន AFP។
យោងតាមប្រព័ន្ធផ្សព្វផ្សាយរដ្ឋចិន យន្តហោះ C919 ដែលត្រូវបានកសាងឡើងដោយក្រុមហ៊ុនអវកាសរដ្ឋចិន COMAC ត្រូវបានកំណត់ដាក់ឲ្យហោះហើរនៅទីក្រុងសៀងហៃនៅថ្ងៃសុក្រសប្ដាហ៍នេះ។
យន្តហោះមានខ្លួនតូចនេះ បានបង្ហាញឲ្យឃើញនូវកិច្ចខិតខំប្រឹងប្រែងអស់រយៈពេលជិត ១ទសវត្សរ៍របស់ក្រុមហ៊ុនរដ្ឋចិន COMAC ដើម្បីកាត់បន្ថយការពឹងផ្អែកលើក្រុមហ៊ុនផលិតយន្តហោះអឺរ៉ុប Airbus និងក្រុមហ៊ុនផលិតយន្តហោះអាមេរិក Boeing។
យន្តហោះ C919 នេះ គឺជាយន្តហោះប្រភេទដឹកជញ្ជូនអ្នកដំណើរធំដំបូងគេរបស់ចិន និងជាសញ្ញាថ្មីបំផុតនៃការមហិច្ឆតា និងជំនាញបច្ចេកទេសរបស់ចិន។ យន្តហោះនេះអាចផ្ទូកអ្នកដំណើរបាន ១៦៨នាក់ និងហោះហើរបានដល់ទៅ ៥៥៥៥គីឡូម៉ែត្រ៕
