មនុស្ស ៦នាក់ ត្រូវបានកម្លាំងបង្ក្រាបភេរវកម្មរបស់ប្រទេសម៉ាឡេស៊ី ចាប់ខ្លួន ដោយសង្ស័យថា មានជាប់ពាក់ព័ន្ធនឹងសកម្មភាពនានា ទាក់ទងនឹងក្រុមបះបោររដ្ឋឥស្លាម។ នេះដោយយោងតាមសេចក្ដីរាយការណ៍របស់សារព័ត៌មាន Channel News Asia។
មនុស្សទាំង ៦នាក់នោះ ក្នុងនោះមានស្ត្រី ២នាក់ សុទ្ធតែជាពលរដ្ឋម៉ាឡេស៊ីទាំងអស់។
ជនសង្ស័យជាបុរស ២នាក់ ត្រូវបានអាជ្ញាធរម៉ាឡេស៊ីចាប់ខ្លួននៅតំបន់កេឡាន់តាន់ ដោយសារបានជួញដូរអាវុធខុសច្បាប់ពីភាគខាងត្បូងថៃ ចូលក្នុងប្រទេសម៉ាឡេស៊ី។ ចំណែកជនសង្ស័យម្នាក់ទៀត ត្រូវបានសមត្ថកិច្ចម៉ាឡេស៊ីបញ្ជាក់ថា បានព្យាយាមបើកការវាយប្រហារទៅលើវិហារស៊ីអា ស្ថិតក្នុងតំបន់ប៉េណាំង។
អាជ្ញាធរម៉ាឡេស៊ី បានឲ្យដឹងបន្ថែមថា ជនសង្ស័យម្នាក់ទៀត បានរត់គេចខ្លួនទៅភាគខាងត្បូងប្រទេសថៃ ជាមួយអាវុធ ៣ដើម៕
