មេដឹកនាំរដ្ឋាភិបាលយោធាថៃ បានអះអាងថា ប្រធានាធិបតីអាមេរិក លោក ដូណាល់ ត្រាំ បានធានាចំពោះរូបលោកថា ទំនាក់ទំនងថៃជាមួយនឹងអាមេរិក នឹងកាន់តែជិតស្និទ្ធជាងពេលមុន ដែលនេះគូសបញ្ជាក់ឲ្យឃើញពីការផ្លាស់ប្ដូរជំហរមួយ ខុសពីរដ្ឋបាលមុនរបស់អាមេរិក នៅក្រោយរដ្ឋប្រហារយោធាឆ្នាំ២០១៤។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន Reuters។
លោក ត្រាំ បានអញ្ចើញនាយករដ្ឋមន្ត្រីថៃ លោក ប្រាយុទ្ធ ចាន់អូចា និងប្រធានាធិបតីហ្វីលីពីន លោក រ៉ូទ្រីហ្កូ ឌូទើតេ ឲ្យទៅទស្សនកិច្ចនៅសេតវិមាន នៅអំឡុងជជែកតាមគ្នាតាមទូរស័ព្ទដាច់ដោយឡែកកាលពីចុងសប្ដាហ៍កន្លងមកនេះ ខណៈដែលលោក ត្រាំ ស្វែងរកការគាំទ្រពីតំបន់នេះ ចំពេលដែលអាមេរិកមានភាពតានតឹងជាមួយកូរ៉េខាងជើង។
លោក ប្រាយុទ្ធ បានប្រាប់ថា ប្រធានាធិបតីអាមេរិកបាននិយាយថា មេដឹកនាំទាំងពីរជាសម្ព័ន្ធមិត្តល្អនឹងគ្នា ហើយលោក ត្រាំ បានធានាចំពោះរូបលោកថា ទោះបីជាមានជំហរខុសគ្នានាពេលថ្មីៗនេះក្ដី ប៉ុន្តែ ទំនាក់ទំនងថៃ-អាមេរិក នឹងកាន់តែជិតស្និទ្ធជាងពេលមុន៕