ប្រធានាធិបតីអាមេរិក លោក ដូណាល់ ត្រាំ និងប្រធានាធិបតីរុស្ស៊ី លោក វ៉្លាឌីមៀរ ពូទីន បានជជែកគ្នាតាមទូរស័ព្ទជាលើកដំបូងកាលពីយប់មិញនេះ ដែលនោះគឺជាការជជែកគ្នាជាលើកដំបូងរវាងមេដឹកនាំទាំងពីរ ចាប់តាំងពីការវាយប្រហារតាមផ្លូវអាកាសរបស់អាមេរិក ទៅលើមូលដ្ឋានកងទ័ពស៊ីរី កាលពីថ្ងៃទី០៤ ខែមេសា ដែលជំរុញឲ្យទំនាក់ទំនងប្រទេសទាំងពីរជាប់គាំង និងមេដឹកនាំទាំងពីរនិយាយថា ពួកគេនឹងស្វែងរកបទឈប់បាញ់គ្នានៅក្នុងសង្គ្រាមស៊ីវិលស៊ីរី។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន Reuters។
ទាំងសេតវិមាន និងវិមានក្រឹមឡាំង សុទ្ធតែបានចេញសេចក្ដីប្រកាសព័ត៌មាន ដែលបានឲ្យដឹងថា មេដឹកនាំទាំងពីរបានជជែកគ្នាប្រកបដោយផ្លែផ្កា ក្នុងនោះមានទាំងបញ្ហាកូរ៉េខាងជើង និងការប្រយុទ្ធប្រឆាំងនឹងពួកបះបោរឥស្លាមនិយមនៅទូទាំងតំបន់មជ្ឈឹមបូព៌ា។
លោក ត្រាំ បានបញ្ជាឲ្យមានការវាយប្រហារតាមផ្លូវអាកាសទៅលើមូលដ្ឋានកងទ័ពស៊ីរី ក្នុងលក្ខណៈជាការសងសឹកទៅនឹងការវាយប្រហារដោយអាវុធគីមី ដែលនាំឲ្យអាមេរិកបន្ទោសប្រធានាធិបតីស៊ីរី លោក បាសារ អាល់អាសាដ ប៉ុន្តែ បែរជាជំរុញឲ្យមានការតវ៉ាពីប្រទេសរុស្ស៊ីដែលជាសម្ព័ន្ធមិត្តរបស់លោក អាសាដ ហើយរុស្ស៊ីបានបន្ទោសទៅលើក្រុមបះបោរស៊ីរីវិញ ចំពោះការវាយប្រហារដោយប្រើឧស្ម័នគីមី៕