អ្នកនាំពាក្យអាមេរិក បាននិយាយនៅថ្ងៃនេះថា អាមេរិកកំពុងតែស្វែងរកជម្រើសនានានៅឯក្រុមប្រឹក្សាសន្តិសុខអង្គការសហប្រជាជាតិ ដើម្បីជំរុញការដាក់គំនាបទៅលើកូរ៉េខាងជើង បន្ទាប់ពីរដ្ឋឯកោមួយនេះ បានបាញ់សាកល្បងគ្រាប់មីស៊ីលជាថ្មីម្ដងទៀត។
អ្នកនាំពាក្យសម្រាប់បេសកកម្មអាមេរិកប្រចាំអង្គការសហប្រជាជាតិ បាននិយាយថា សកម្មភាពផ្ទួនៗរបស់កូរ៉េខាងជើងចាប់តាំងពីការសាកល្បងនុយក្លេអ៊ែរលើកចុងក្រោយរបស់ខ្លួនមក បានជំរុញឲ្យអាមេរិកស្វែងរកវិធានការនានាដែលនឹងដាក់សម្ពាធបន្ថែម។
ក្រុមអ្នកកាទូតនិយាយថា អាមេរិកកំពុងរៀបចំទណ្ឌកម្មថ្មីមួយបន្ថែមទៀត នៅក្នុងករណីមានការបាញ់សាកល្បងគ្រាប់មីស៊ីល ឬនុយក្លេអ៊ែរបន្ថែមទៀត។
កូរ៉េខាងជើងកាលពីចុងសប្ដាហ៍កន្លងមកនេះ បានសាកល្បងគ្រាប់មីស៊ីលមិនបានសម្រេចមួយ តែប៉ុន្មានម៉ោងក្រោយពីរដ្ឋមន្ត្រីការបរទេសអាមេរិក លោក Rex Tillerson បានជំរុញទៅក្រុងប្រឹក្សាសន្តិសុខអង្គការសហប្រជាជាតិ ឲ្យដាក់ទណ្ឌកម្មថ្មី ដោយព្រមានថា បរាជ័យក្នុងការចាត់វិធានការ អាចនាំទៅរកផលវិបាកដ៏មហន្តរាយ៕