អណ្តូងរ៉ែទ្រង់ទ្រាយធំមួយនៅភាគខាងជើងនៃប្រទេសអ៊ីរ៉ង់បានបាក់កាលពីថ្ងៃពុធម្សិលមិញ បានបណ្តាលឲ្យស្លាប់មនុស្សចំនួន២១នាក់ ជាអ្នកដែលធ្វើការនៅក្នុងនោះ។
សមត្ថកិច្ចឲ្យដឹងថា សាកសពមនុស្សចំនួន២១នាក់នោះ គឺជាអ្នកដែលស្លាប់ដោយសារ ពួកគេព្យាយាមចូលក្នុងផ្លូវរ៉ូង ដើម្បីទៅជួយមិត្តភ័ក្តិចំនួន៣២នាក់ទៀត ដែលកំពុងបាត់ខ្លួននៅក្នុងរ៉ូងអណ្តូងរ៉ែនោះ។
ព័ត៌មានបឋមបង្ហាញថា អណ្តូងរ៉ែ Zemestan Yort ស្ថិតនៅខេត្ត Golestan ភាគខាងជើងនៃប្រទេសអ៊ីរ៉ង់ គឺកម្មករក្នុងនោះព្យាយាមរត់ចេញ នៅពេលមានការផ្ទុះឧស្ម័នម៉េតាន។ នេះបើតាមទីភ្នាក់ងារព័ត៌មានAFP។
មនុស្សចំនួន៣២នាក់ទៀត នៅតែបាត់ខ្លួននៅក្នុងអណ្តូង ដែលនេះជាអណ្តូងជ្រៅមួយក្នុងចំណោមអណ្តូងផ្សេងៗទៀតដែលមានជម្រៅ១៣០០ម៉ែត្រ ។ ចំណែកក្រុមជួយសង្គ្រោះ កំពុងធ្វើសកម្មភាពចូលទៅបានយឺតៗ ដោយសារតាមផ្លូវចូលនោះមានផ្ទុកទៅដោយ សម្ភារ និង រ៉ែជិត១០០០ម៉ែត្រ ហើយរហូតដល់ព្រឹកថ្ងៃព្រហស្បតិ៍ក្រុមជួយសង្គ្រោះបានសំអាតផ្លូវចូលបាន៦០០ម៉ែត្រ៕