ទីភ្នាក់ងារពង្រឹងសន្តិសុខរបស់ថៃ បង្កើនការប្រុងប្រយ័ត្នខ្ពស់ បន្ទាប់ពីមានរបាយការណ៍ពីអាជ្ញាធរម៉ាឡេស៊ីថា ក្រុមបណ្តាញរដ្ឋឥស្លាម ដែលបង្កអំពើភេរវកម្មបានចូលដល់ភាគខាងត្បូងថៃជាកន្លែងកំពុងមានក្រុមបះបោរឥស្លាមផ្តាច់ខ្លួនធ្វើសកម្មភាព។
អ្នកនាំពាក្យក្រសួងការពារជាតិរបស់ថៃ លោក Maj Gen Kongcheep Tantravanich ថ្លែងក្នុងសេចក្តីថ្លែងការណ៍ថា ឧបនាយករដ្ឋមន្ត្រី និង ជារដ្ឋមន្ត្រីក្រសួងការពារជាតិលោក Prawit Wongsuwon បានបញ្ជាទៅក្រុមចារកម្ម ឲ្យទាក់ទងផ្លាស់ប្តូរព័ត៌មាន និង បញ្ជាក់ពីរបាយការណ៍របស់ម៉ាឡេស៊ីដែលបញ្ជាក់ថា ពួកISចូលភាគខាងត្បូងនៃប្រទេសថៃ។ នេះបើតាមទីភ្នាក់ងារព័ត៌មានម៉ាឡេស៊ី Bernama។
លោក Prawit បានបញ្ជាក់ឲ្យ យោធាភូមិភាគ៤ និង នគរបាល មានការប្រុងប្រយ័ត្នខ្ពស់ និង តាមដានស្ថានការណ៍បានច្បាស់លាស់បំផុត។
អ្នកនាំពាក្យក្រសួងការពារជាតិថៃ បញ្ជាក់ថា ថៃបានទទួលរបាយការណ៍ពីម៉ាឡេស៊ីជុំវិញករណីពួកISនេះ ហើយ ដែលបញ្ជាក់ថា មានការឆ្លងកាត់ព្រំដែនចូលភាគខាងត្បូង។ លោកក៏បានអំពាវនាវកុំឲ្យពលរដ្ឋមានការភ័យខ្លាច ហើយឲ្យមានការជឿជាក់លើរដ្ឋាភិបាលថា ប្រាកដជាអាចការពារសន្តិសុខសុវត្ថិភាពបានជុំវិញការគំរាមកំហែងនានា។
មួយរយៈចុងក្រោយនេះ អាជ្ញាធរម៉ាឡេស៊ី បានចាប់ខ្លួន អ្នកពាក់ព័ន្ធនិងក្រុមIS ជាបន្តបន្ទាប់ ដែលអ្នកខ្លះ មានបំណងធ្វើដំណើរទៅកាន់ប្រទេស៊ីរី អ្នកខ្លះគៀងគរ មនុស្ស និង ថវិកា ដើម្បីជួយដល់ក្រុមIS ដែលកំពុងធ្វើសកម្មភាពនៅស៊ីរី និង អ៊ីរ៉ាក់៕