បុរសជនជាតិតួកគី២នាក់ ត្រូវបានសមត្ថកិច្ចម៉ាឡេស៊ីចាប់ខ្លួនកាលពីថ្ងៃទី២ខែឧសភា ដោយសង្ស័យថាបានធ្វើសកម្មភាពពាក់ព័ន្ធជាមួយចលនាក្រុមរដ្ឋឥស្លាម។
នគរបាលនៅកូឡាឡាំពួរ ថ្លែងកាលពីថ្ងៃព្រហស្បតិ៍ម្សិលមិញថា អង្គភាពពិសេសប្រឆាំង ភេរវកម្ម បានតាមដានការទំនាក់ទំនងរវាងបុរសពីររូបជាជនជាតិតួកគី ហើយសម្រេចចាប់ខ្លួនដោយចោទថា បានធ្វើសកម្មភាពដើម្បីគៀងគរឲ្យមានកម្លាំងចួលរួម និងប្រមូលថវិកាដើម្បីយកទៅជួយពួក IS។ នេះបើតាមការចុះផ្សាយរបស់សារព័ត៌មាន Channel News Asia។
អង្គភាពពិសេសប្រឆាំងភេរវកម្មបានតាមដានការទំនាក់ទំនងជាឯកជនរបស់មនុស្សជាច្រើន រួមទាំងសកម្មភាពពង្រីកការទំនាក់ទំនង ការផ្សព្វផ្សាយគំនិតអ្វីមួយ និងការប្រមូលមូលនីធិជាដើម។ អាជ្ញាធរបញ្ជាក់ថា ការចាប់ខ្លួនបុរសទាំងពីរនេះ គឺបន្ទាប់ពីការស៊ើបអង្កេតច្បាស់លាស់។
អង្គការឃ្លាំមើលសិទ្ធិមនុស្សអន្តរជាតិ ជំរុញឲ្យអាជ្ញាធរអនុវត្តន៍សិទ្ធិរបស់ពួកគេក្នុងពេលជាប់ឃុំដូចជា អាចជួបជាមួយក្រុមគ្រួសារនិងមេធាវី របស់ពួកគេ៕