ប្រទេសម៉ាឡេស៊ី បានបញ្ជាក់ថា មេភេរវករជាន់ខ្ពស់មានដើមកំណើតម៉ាឡេស៊ី លោក មូហាំម៉េដ វ៉ាន់ឌី មូហាម៉េដ ចេឌី ដែលចូលរួមជាមួយក្រុមរដ្ឋឥស្លាមនៅក្នុងប្រទេសស៊ីរីនោះ បានស្លាប់ហើយ។ នេះដោយយោងតាមការចុះផ្សាយរបស់សារព័ត៌មានសិង្ហបុរី Channel News Asia។
សារព័ត៌មានសិង្ហបុរីបានចុះផ្សាយដូច្នេះ បន្ទាប់ពីមេប៉ូលិសម៉ាឡេស៊ី លោក ខាលីដ អាប៊ូ បាការ បានបង្ហោះសារនៅលើ Twitter កាលពីថ្ងៃម្សិលមិញថា ក្រោយសិក្សាលើព័ត៌មានសម្ងាត់ដែលទទួលបាន ប៉ូលិសម៉ាឡេស៊ីអាចបញ្ជាក់បានថា មូហាំម៉េដ វ៉ាន់ឌី ត្រូវបានគេសម្លាប់នៅក្នុងការវាយប្រហារមួយនៅតំបន់ Raqqa ក្នុងប្រទេសស៊ីរី កាលពីថ្ងៃទី២៩ ខែមេសា។
អាជ្ញាធរម៉ាឡេស៊ីបានដឹងពីការស្លាប់របស់ភេរវកររូបនេះ បន្ទាប់ពីភរិយារបស់គេបានបង្ហោះសារនៅលើទំព័រហ្វេសប៊ុក ប៉ុន្តែ អាជ្ញាធរម៉ាឡេស៊ីមានមន្ទិលសង្ស័យច្រើនទៅលើដំណឹងនេះ។
មេប៉ូលិសប្រឆាំងភេរវកម្មម៉ាឡេស៊ី លោក អាយ៉ូប ខាន់ បានប្រាប់សារព័ត៌មានសិង្ហបុរីកាលពីសប្ដាហ៍មុនថា សារដែលបានបង្ហោះនោះ ត្រូវបានធ្វើឡើងដោយភេរវករ វ៉ាន់ឌី ដោយផ្ទាល់ ដើម្បីគេចចេញពីការតាមចាប់ខ្លួន។
សារព័ត៌មានសងិ្ហបុរីបានចុះផ្សាយថា ភេរវករ វ៉ាន់ឌី មិនត្រឹមតែត្រូវបានប្រទេសម៉ាឡេស៊ី និងអាមេរិកស្វែងរកចាប់ខ្លួនដោយសារតែសកម្មភាពនានាពាក់ព័ន្ធនឹងភេរវកម្មនោះទេ ប៉ុន្តែ ក្រុមរដ្ឋឥស្លាមក៏តាមចាប់ខ្លួនរូបគេផងដែរ ក្រោយពីរងការចោទថា បានកេងប្រវ័ញ្ចលុយពីមូលនិធិនានា ដែលប្រមូលបានពីក្រៅប្រទេស សម្រាប់ប្រើប្រាស់ផ្ទាល់ខ្លួន។ វ៉ាន់ឌី ត្រូវអាមេរិកបញ្ចូលក្នុងបញ្ជីក្រុមភេរវករកាលពីខែមីនាកន្លងមកនេះ៕
