រញ្ជួយដីកម្រិតមធ្យមមួយដែលបានវាយប្រហារកៀកផ្ទៃលើនៃផែនដី បានសម្លាប់មនុស្ស ៨នាក់ និងបណ្ដាលឲ្យមនុស្សជាង ២០នាក់ទៀតរងរបួស នៅភាគខាងលិច នៅថ្ងៃនេះ។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន AP ដែលបានដកស្រង់សម្ដីរដ្ឋបាលគ្រប់គ្រងគ្រោះមហន្តរាយ ប្រចាំតំបន់។
រញ្ជួយដីពេលព្រឹក បានវាយប្រហារតំបន់ Taxkorgan ជាតំបន់ជួរភ្នំដាច់ស្រយាល ក្នុងតំបន់ស៊ិនជាំង ដែលស្ថិតនៅជាប់ព្រំដែននឹងប្រទេសតាជីគីស្ថាន អាហ្វហ្កានីស្ថាន និងប៉ាគីស្ថាន។ រដ្ឋបាលរញ្ជួយដីតំបន់ស៊ិនជាំង បាននិយាយថា ផ្ទះសម្បែងជាង ១៨០ខ្នង បានដួលរលំនៅតាមតំបន់សម្បូរទៅដោយប្រជាជន។
ទីភ្នាក់ងារស្ទង់ភូមិសាស្ត្រអាមេរិក បាននិយាយថា រញ្ជួយដីកម្រិត ៥.៤រ៉ិកទ័រ បានកើតឡើងនៅជម្រៅ ១០គីឡូម៉ែត្រក្នុងផែនដី នៅម៉ោង ៥ និង៥៨នាទី។ កម្រិតរញ្ជួយនោះ បង្កឲ្យមានរំញ័រខ្លាំងនៅលើផ្ទៃផែនដី ដែលអាចបង្កមហន្តរាយកាន់តែធំ។
គ្រោះរញ្ជួយដីបានកើតឡើងជាធម្មតានៅភាគខាងលិចប្រទេសចិន ប៉ុន្តែ ដោយសារតំបន់នោះមានដងស៊ីតេប្រជាជនទាប ទើបមហន្តរាយមានកម្រិតតិចតួចប៉ុណ្ណោះ។ ទោះជាយ៉ាងណា រញ្ជួយដីកម្រិត ៦.៨រ៉ិកទ័រ កាលពីឆ្នាំ២០០៣ នៅក្នុងតំបន់ជិតនោះ បានសម្លាប់មនុស្សដល់ទៅ ២៦៨នាក់៕
រញ្ជួយដីខ្លាំងក្លាបំផុតនៅក្នុងប្រទេសចិន បានកើតឡើងកាលពីខែឧសភា ឆ្នាំ២០០៨ នៅតំបន់ស៊ីឈួន ដោយបានសម្លាប់មនុស្សដល់ទៅ ៩ម៉ឺននាក់៕