អាជ្ញាធរនេប៉ាល់បានឲ្យដឹងថា អ្នកឡើងលើភ្នំ Everest កាលពីចុងសប្តាហ៍មុនគឺ៣នាក់បានស្លាប់ និង ម្នាក់ទៀតបានបាត់ខ្លួន ដោយសារតែបញ្ហាអាកាសធាតុគឺមានខ្យល់ និង ត្រជាក់ខ្លាំង។
របាយការណ៍របស់អាជ្ញាធរនេប៉ាល់បង្ហាញថា ចំនួនស្លាប់ថ្មីនេះ ធ្វើឲ្យចំនួនអ្នកស្លាប់ដោយសារការឡើងភ្នំ Everest កើនដល់១៨នាក់ ក្នុងរយៈពេល២ឆ្នាំចុងក្រោយនេះ។
តាមទីភ្នាក់ងារព័ត៌មាន AFP បានឲ្យដឹងថា ៣ថ្ងៃចុងក្រោយនេះ អាជ្ញាធរនេប៉ាល់បានប្រើប្រាស់ឧត្ថម្ភាចក្រជួយសង្គ្រោះអ្នកឡើងភ្នំរាប់សិបនាក់ក្នុងពេលពួកគេជួបស្ថានភាពគ្រោះថ្នាក់ដោយសារអាកាសធាតុ។ ភ្នំ Everestមានកម្ពស់ខ្ពស់ជាងគេលើពិភពលោកគឺ ៨ ៨៤៨ ម៉ែត្រ។
នេប៉ាល់មិនទាន់បានបញ្ជាក់ថា អ្នកស្លាប់ទាំងបី និង បាត់ខ្លួនម្នាក់នោះ ជាជនជាតិណាខ្លះទេ គ្រាន់តែបញ្ជាក់ថា អ្នកនោះស្លាប់នៅពេលឡើងដល់កម្ពស់ប្រមាណ៨០០០ម៉ែត្រ ជាតំបន់គ្រោះថ្នាក់ខ្លាំង ខ្វះខ្យល់ដកដង្ហើម ដែលគេឲ្យឈ្មោះទីនោះថា ជាតំបន់មរណៈ។
ថ្មីៗនេះ និស្សិតតៃវ៉ាន់ពីរនាក់នាំគ្នាឡើងភ្នំនេះ រហូតវង្វេង៤៧ថ្ងៃ ត្រូវការងារជួយសង្គ្រោះបានម្នាក់ ហើយម្នាក់ទៀតបានស្លាប់ដោយសារការធ្លាក់ពីលើជ្រោះជ្រៅមួយ៕
