អន្តរជាតិ

បំផ្ទុះគ្រាប់បែកនៅទីក្រុងមេនឆែស្ទ័រ ស្លាប់យ៉ាងតិច១៩នាក់ របួស៥០នាក់

លោក ឌិត សុខធី
| ២៣ ឧសភា ២០១៧
ម៉ោង ០៩:០៤

ប៉ូលិសអង់គ្លេស បាននិយាយថា មនុស្ស ១៩នាក់ ត្រូវបានបញ្ជាក់ថាស្លាប់ ខណៈមនុស្សប្រហែល ៥០នាក់ទៀត បានរងរបួស ក្រោយពីមានការបំផ្ទុះគ្រាប់បែកនៅឯ Manchester Arena កាលពីយប់មិញនេះ ជាទីដែលអ្នកចម្រៀងអាមេរិក Ariana Grande កំពុងសម្ដែងនៅទីនោះ។ នេះដោយយោងតាមការផ្សាយរបស់ Reuters។

សេចក្ដីប្រកាសព័ត៌មានថ្មីបំផុតបានបន្ថែមថា ប៉ូលិសបានចាត់ទុកអំពើហឹង្សានេះជា “ករណីភេរវកម្មរហូតដល់ប៉ូលិសរកឃើញហេតុផលផ្សេង”។ ប៉ូលិសបាននិយាយថា ពួកគេបានឆ្លើយតបនឹងទូរស័ព្ទមួយខ្សែនៅមុនម៉ោង ១០ និង ៣៥នាទីយប់ ម៉ោងនៅក្នុងប្រទេសអង់គ្លេស។

សេចក្ដីរាយការណ៍នានា បានផ្សាយថា ក្មេងស្រីជាច្រើននាក់ ស្ថិតក្នងចំណោមអ្នកស្លាប់ ប៉ុន្តែ ករណីនេះ មិនទាន់ទទួលបានការបញ្ជាក់ពីអាជ្ញាធរនៅឡើយទេ។

មន្ត្រីពីរនាក់របស់អាមេរិក ដែលបាននិយាយក្នុងលក្ខខ័ណ្ឌមិនបញ្ចេញឈ្មោះ បាននិយាយថា សញ្ញាដំបូងៗ បានចង្អុលបង្ហាញទៅរកជនវាយប្រហារគ្រាប់បែកអត្តឃាត ជាដើមហេតុនៃការបំផ្ទុះនោះ។

រថយន្តសង្គ្រោះត្រូវបានគេឃើញបើកបររួតរះទៅកាន់តំបន់នោះ ហើយប៉ូលិសបានបន្ថែមថា ពលរដ្ឋគួរតែគេចចេញពីតំបន់នោះ៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។