ប្រធានអង្គការសុខាភិបាលពិភពលោកដែលនឹងផុតអាណត្តិ អ្នកស្រី ម៉ាហ្ការ៉េត ចាន់ បានការពារកេរដំណែលរបស់អ្នកស្រីនៅថ្ងៃនេះ ដោយអះអាងថា ពិភពលោកបានប្រុងប្រៀបខ្លួនកាន់តែប្រសើរ ដើម្បីប្រឈមមុខនឹងជំងឺថ្មីៗ ដូចជាជំងឺអេបូឡាជាដើម។ នេះដោយយោងតាមការផ្សាយរបស់ AFP។
នៅក្នុងសុន្ទរកថាចុងក្រោយថ្លែងទៅកាន់រដ្ឋជាសមាជិកអង្គការសុខភាពពិភពលោក អ្នកស្រី ចាន់ បានទទួលស្គាល់ថា មានកំហុសកើតឡើងអំឡុងអាណត្តិ ១០ឆ្នាំរបស់អ្នកស្រី ប៉ុន្តែ អ្នកស្រីសង្កត់ធ្ងន់ថា បើទោះបីធ្វើដំណើរទាំងលំបាក ប៉ុន្តែ មិនដែលបោះបង់នោះឡើយ។
ថ្លែងទៅកាន់ប្រតិភូប្រហែល ៤០០០នាក់ មកពីបណ្ដាប្រទេស ១៩៤ នៅក្នុងសន្និបាតប្រចាំឆ្នាំនៅទីក្រុងហ្សឺណែវ អ្នកស្រីប្រាប់ថា ពិភពលោកបានប្រុងប្រៀបខ្លួនកាន់តែប្រសើរ ប៉ុន្តែ មិនទាន់គ្រប់គ្រាន់នោះឡើយ។
អ្នកស្រី ចាន់ ដែលនឹងត្រូវជំនួសដោយអ្នកថ្មីនៅថ្ងៃនេះ បានបង្ហាញនូវជោគជ័យជាច្រើន ដែលអ្នកស្រីថា ធ្វើឲ្យអង្គការសុខភាពពិភពលោកជៀសផុតការរិះគន់ថា អង្គការនេះមិនបានបំពេញតួនាទីរបស់ខ្លួន។
អ្នកស្រី ចាន់ មានហេតុផលក្នុងការការពារខ្លួន ប៉ុន្តែ នៅអំឡុងអាណត្តិរបស់អ្នកស្រី អង្គការសុខភាពពិភពលោកប្រឈមមុខនឹងការរិះគន់ចំពោះបរាជ័យក្នុងការដោះស្រាយបញ្ហាសុខភាពជាច្រើន ជាពិសេសការផ្ទុះឡើងនៃជំងឺអេបូឡានៅតំបន់អាហ្វ្រិកខាងលិច ដែលបានសម្លាប់មនុស្សជាង ១១,៣០០នាក់ នៅចន្លោះចុងឆ្នាំ២០០៣ និងដើមឆ្នាំ២០១៦៕