ប្រមុខអង្គការសហប្រជាជាតិ លោក Antonio Guterres បាននិយាយនៅថ្ងៃនេះថា លោកព្យាយាមបញ្ចុះបញ្ចូលរដ្ឋបាលប្រធានាធិបតីអាមេរិក លោក ដូណាល់ ត្រាំ ឲ្យយល់ពីតម្លៃនៃការវិនិយោគផ្នែកជំនួយបរទេស និងកាទូត ហើយបានព្រមានថា ប្រសិនបើក្រុងវ៉ាស៊ីងតោនដកខ្លួនចេញពីតួនាទីជាមហាអំណាចពិភពលោក ប្រទេសដទៃនឹងបង្កើនតួនាទីរបស់ខ្លួន។ នេះដោយយោងតាមការចុះផ្សាយរបស់ Reuters។
លោក ត្រាំ បានស្នើកាត់កញ្ចប់ជំនួយ និងកាទូតអាមេរិកប្រហែលមួយភាគបី ឬជិត ១៩ពាន់លានដុល្លារ ក្នុងនោះរួមបញ្ចូលទាំងការកាត់ជំនួយប្រហែល ១ពាន់លានដុល្លារពីមូលនិធិរក្សាសន្តិភាពរបស់អង្គការសហប្រជាជាតិ និងអង្គការអន្តរជាតិនានា។
លោក Guterres បានថ្លែងថា អង្គការសហប្រជាជាតិកំពុងតែប្រឹងប្រែងអស់ពីសមត្ថភាពក្នុងការពិភាក្សាជាមួយរដ្ឋបាលអាមេរិក និងសភា ឲ្យយល់ពីថា ការផ្ដល់ជំនួយអភិវឌ្ឍន៍ ការផ្ដល់ជំនួយគោលនយោបាយការបរទេស ការផ្ដល់ជំនួយអង្គការនានា ដូចជាអង្គការសហប្រជាជាតិ ក៏ជាផលប្រយោជន៍ប្រជាជនអាមេរិកដែរ។
សភាអាមេរិក គឺជាអ្នកអនុម័តលើកញ្ចប់ថវិការដ្ឋាភិបាល ហើយក្រុមសមាជិកសភាបក្សសាធារណរដ្ឋ ដែលបានគ្រប់គ្រងសភាទាំងពីរថ្នាក់ និងសមាជិកសភាបក្សប្រជាធិបតេយ្យ បាននិយាយថា ពួកគេមិនគាំទ្រការកាត់បន្ថយជំនួយបែបនេះនោះឡើយ៕
