ប្រេសិតអាមេរិកប្រចាំអង្គការសហប្រជាជាតិ អ្នកស្រី និកឃី ហាឡេយ៍ បាននិយាយនៅថ្ងៃនេះថា សហរដ្ឋអាមេរិក និងចិន កំពុងតែជជែកគ្នាអំពីជំហានបន្ទាប់ក្នុងការឆ្លើយតបទៅនឹងការបាញ់សាកល្បងគ្រាប់មីស៊ីលរបស់កូរ៉េខាងជើង ហើយប្រទេសទាំងពីរអាចសម្រេចលើទណ្ឌកម្មថ្មីនៅសប្ដាហ៍នេះ។ នេះដោយយោងតាមការផ្សាយរបស់ទីភ្នាក់ងារព័ត៌មាន AFP។
អ្នកស្រី ហាឡេយ៍ បានប្រាប់អ្នកយកព័ត៌មានថា ចិនកំពុងតែជំរុញក្រុងព្យុងយ៉ាងឲ្យផ្លាស់ប្ដូរឥរិយាបថរបស់ខ្លួន និងកំពុងជជែកជាមួយអាមេរិក អំពីសេចក្ដីសម្រេចដាក់ទណ្ឌកម្មថ្មី។
កូរ៉េខាងជើងបានសាកល្បងគ្រាប់មីស៊ីលជាបន្តបន្ទាប់ក្នុងរយៈពេលមិនដល់ ៣សប្ដាហ៍ចុងក្រោយនេះ ដែលនាំឲ្យមានការព្រមានពីអង្គការសហប្រជាជាតិថា ប្រទេសនឹងប្រឈមមុខនឹងទណ្ឌកម្មថ្មី។
កាលពីថ្ងៃចន្ទកន្លងមកនេះ ក្រុងព្យុងយ៉ាងបានបាញ់សាកល្បងគ្រាប់មីស៊ីលរយៈចម្ងាយខ្លីដែលបានធ្លាក់នៅជិតនឹងប្រទេសជប៉ុន។
អាមេរិកបានចាប់ផ្ដើមជជែកអំពីទណ្ឌកម្មថ្មីជាមួយប្រទេសចិនកាលពីមួយខែមុន ដោយបានព្រាងសំណើសេចក្ដីសម្រេចមួយដាក់ទៅក្រុមប្រឹក្សាសន្តិសុខអង្គការសហប្រជាជាតិ ប៉ុន្តែ រហូតមកដល់ពេលនេះ សេចក្ដីព្រាងសេចក្ដីសម្រេចនោះ នៅមិនទាន់ទទួលបានការយល់ព្រមនៅឡើយទេ៕
