យោធាអាមេរិកបាននិយាយនៅថ្ងៃនេះថា ខ្លួនបានបាញ់ស្កាត់គ្រាប់មីស៊ីលអន្តរទ្វីបមួយ នៅក្នុងការសាកល្បងជាលើកដំបូងមួយ ដែលបានកើតឡើងចំពេលដែលមានក្ដីកង្វល់កាន់តែខ្លាំងជុំវិញកម្មវិធីផលិតអាវុធរបស់កូរ៉េខាងជើង។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន AFP។
ក្រសួងការពារជាតិអាមេរិកបាននិយាយក្នុងសេចក្ដីប្រកាសព័ត៌មានមួយថា ឧបករណ៍ស្កាត់ចាប់គ្រាប់មីស៊ីលដែលត្រូវបានបាញ់ចេញពីមូលដ្ឋានកងទ័ពអាកាស Vandenberg នៅទីក្រុងកាលីហ្វ័រញ៉ា បានស្កាត់ចាប់ដោយជោគជ័យនូវគ្រាប់មីស៊ីលអន្តរទ្វីបមួយ ដែលត្រូវបានគេបាញ់ចេញពីទីតាំងសាកល្បងនៅលើកោះ Marshall។
នៅក្នុងការសាកល្បងនោះ គ្រាប់រ៉ុកកែតមួយបានផ្ទុះហោះទៅលើអាកាស និងហោះទៅបុកគ្រាប់មីស៊ីលអន្តរទ្វីប ដោយបានបំផ្លាញគ្រាប់មីស៊ីលនោះបានសម្រេច។
ឧត្ដមនាវីរង លោក Jim Syring នាយកទីភ្នាក់ងារការពារមីស៊ីលអាមេរិក ត្រូវបានដកស្រង់សម្ដីដែលនិយាយថា ប្រព័ន្ធនេះមានសារៈសំខាន់ខ្លាំងសម្រាប់វិស័យការពារជាតិ ហើយការសាកល្បងនេះ បង្ហាញថា យោធាអាមេរិកមានសមត្ថភាពប្រឆាំងនឹងការគំរាមកំហែងពិតប្រាកដ៕