ម៉ាក្រុន ថា ត្រាំ ធ្វើឲ្យប៉ះពាល់ប្រយោជន៍អាមេរិក​នៅថ្ងៃអនាគត

ប្រធានាធិបតីបារាំងលោក​ អីម៉ាណូអែល ម៉ាក្រុន ថ្លែងនៅថ្ងៃព្រហស្បតិ៍ម្សិលមិញថា ការសម្រេចចិត្តរបស់ប្រធានាធិបតីលោក ដូណល ត្រាំ ដែលចាកចេញពីកិច្ចព្រមព្រៀងដោះស្រាយការប្រែប្រួលអាកាសធាតុនោះ នឹងធ្វើឲ្យប៉ះពាល់ដល់ផលប្រយោជន៍ជាតិនិងប្រជាជនអាមេរិក។​

លោកម៉ាក្រុនបានថ្លែងជា ភាសាបារាំងនិងភាសាអង់គ្លេសតាមទូរទស្សន៍ថា កំពុងតែធ្វើសកម្មភាពខុសប្រក្រតី នាំឲ្យប៉ះពាល់ដល់ផលប្រយោជន៍ប្រទេសរបស់លោក។ លោកថា ការសម្រេចចិត្តនេះ បំផ្លាញផែនដីនៅថ្ងៃអនាគត។​ នេះបើតាមទីភ្នាក់ងារព័ត៌មានរ៉យទ័រ។​

ក្នុងលិខិតរបស់លោក ត្រាំ ម្សិលមិញថ្លែងថា លោកសូមអភ័យទោសចំពោះការសម្រេចចិត្តនេះ ហើយថា លោកបើកចំហចំពោះការចរចាលើបញ្ហាផ្សេងៗទៀត។​

ប៉ុន្តែលោក ម៉ាក្រុន ដែលទើបឡើងកាន់តំណែងមិនទាន់ដល់មួយខែនេះ ថ្លែងថា នឹងមិនមានការចរចាអ្វីបន្ថែមទៀតនោះទេ។​

លោក ម៉ាក្រុន ថ្លែងថា បារាំងជឿលើអាមេរិក ពិភពលោកជឿលើអាមេរិក ប៉ុន្តែមិនបណ្តោយឲ្យមានកំហុសលើការដោះស្រាយបញ្ហាប្រែប្រួលអាកាសធាតុនោះទេ ហើយថា មិនមានគម្រោងទី២ដើម្បីជជែកជាមួយអាមេរិកទៀតទេ៕