លោក ហ៊ុន សែន និងលោក កឹម សុខា ហែបក្សទ្រង់ទ្រាយធំថ្ងៃឃោសនាចុងក្រោយ

គណបក្សប្រជាជនកម្ពុជានិងគណបក្សសង្គ្រោះជាតិ ជាគណបក្សដែលមានអាសនៈទាំងពីរនេះ រៀបចំការហែក្បួនធំនៅរាជធានីភ្នំពេញ សម្រាប់ការឃោសនារកការគាំទ្រ សម្រាប់ការបោះឆ្នោតក្រុមប្រឹក្សាឃុំ-សង្កាត់នេះ។

លោក ហ៊ុន សែន ដឹកនាំអ្នកគាំទ្រជួបជុំគ្នាពេលព្រឹក​នៅផ្លូវ៦០ម៉ែត្រ បឹងទំពុន បន្ទាប់ពីថ្លែងសារនយោបាយហើយហែទៅកាន់តំបន់ផ្សេងៗក្នុងរាជធានីភ្នំពេញ ដើម្បីជូបអ្នកគាំទ្រ ក៏ដូចជាផ្សព្វផ្សាយគោលនយោបាយអភិវឌ្ឍន៍ឃុំសង្កាត់សម្រាប់ការបោះឆ្នោតចុងសប្តាហ៍នេះ។​

ចំណែក​លោក កឹម សុខា ជូបជុំអ្នកគាំទ្រនៅត្រើយម្ខាងនៃទន្លេ ពេលព្រឹក ដោយមានថ្លែងសារនយោបាយ ហើយអ្នកគាំទ្រមានការប្រគំតន្ត្រី រហូតដល់រសៀលទើបចាប់ផ្តើមហែបក្សទៅតំបន់ផ្សេងៗក្នុងរាជធានីភ្នំពេញ។​

ចាប់តាំងពីថ្ងៃឃោសនា ថ្ងៃទី២០ ខែឧសភាមក លោក កឹម សុខា​ ដឹកនាំការឃោសនារហូត ចំណែក​លោក ហ៊ុន សែន ទើបតែចេញមុខឃោសនានៅថ្ងៃចុងក្រោយនេះតែប៉ុណ្ណោះ៕