លោក ហ៊ុន សែន ប្រធានគណបក្សកាន់អំណាច បានទៅបោះឆ្នោតរួចហើយ នៅម៉ោងប្រមាណ៧ព្រឹកនេះ ដោយមានអ្នកសារព័ត៌មានរាប់សិបនាក់តាមផ្តិតយករូបភាព។
លោក ហ៊ុន សែន និងភរិយា បានបោះឆ្នោតនៅការិយាល័យសាលាគរុកោសល្យ និងវិក្រិត្យការក្រុងតាខ្មៅខេត្តកណ្តាល។
ប៉ុន្តែលោក ហ៊ុន សែន មិនបានថ្លែងសារអ្វីមកកាន់អ្នកសារព័ត៌មានឡើយ។
ចំណែក លោក កឹម សុខា ប្រធានគណបក្សសង្រ្គោះជាតិវិញ នឹងទៅបោះឆ្នោតនៅម៉ោង១០ព្រឹក នៅការិយាល័យសាលាបឋមសិក្សាចាក់អង្រែលើ។
តាមការសង្កេត ពលរដ្ឋបានទៅឈរតម្រង់ជួរគ្នារង់ចាំបោះឆ្នោតតាំងពីម៉ោងជាង៦ម៉ោងព្រឹកថ្ងៃអាទិត្យនេះជាថ្ងៃបោះឆ្នោតក្រុមប្រឹក្សាឃុំសង្កាត់អាណត្តិទី៤។
គណៈកម្មាធិការជាតិរៀបចំការបោះឆ្នោត (គ.ជ.ប) បានឲ្យដឹងថា ការិយាល័យបោះឆ្នោតសរុបមានចំនួន ២២,១៤៨ការិយាល័យ។ ប៉ុន្តែការិយាល័យចំនួន៥ ត្រូវបានរំកិលទៅកន្លែងថ្មី តែមិនឆ្ងាយពីកន្លែងចាស់នោះទេ ដោយសាររងនូវជំនន់ទឹកភ្លៀង៕