យុវជនពីរនាក់ដែលបានបោះឆ្នោត និង ព្យាយាមតាមដានការរាប់សន្លឹកឆ្នោតនៅវិទ្យាល័យជម្ពូវ័នក្នុងរាជធានីភ្នំពេញ អះអាងថា ពួកគេត្រូវសមត្ថកិច្ចវាយ ពេលដែលសួរនាំថា ច្បាប់ណាហាមពលរដ្ឋមិនឲ្យតាមដានការរាប់សន្លឹកឆ្នោត ។
យុវជនឈ្មោះ សួង នាគព័ន្ធ ប្រាប់វីអូឌីថា ក្រោយពេលដែលបិទការិយាល័យនៅម៉ោង៣រសៀល ដើម្បីរាប់សន្លឹកឆ្នោតនោះ លោក និងមិត្តភ័ក្តិប្រមាណ ១០នាក់ផ្សេងទៀត ឈរឆ្ងាយពីការិយាល័យប្រមាណ១០០ម៉ែត្រ ដើម្បីរង់ចាំលទ្ធផលបោះឆ្នោត។
ប៉ុន្តែលោកថា មួយសន្ទុះក្រោយមក មានរថយន្តសមត្ថកិច្ចចំនួន៣រថយន្តទៅដល់ទីនោះ ហើយបញ្ជាឲ្យពលរដ្ឋចេញពីបរិវេណសាលាទាំងអស់ យុវជននេះបញ្ជាក់ថា លោកបានសួរថា ច្បាប់ណាដែលតម្រូវឲ្យពលរដ្ឋចេញពីមណ្ឌលបោះឆ្នោត ? ហើយលោកថា ក៏ត្រូវសមត្ថកិច្ចទះកំប្លៀង ដោយមិនឆ្លើយសំនួរទេ។
យុវជនម្នាក់ទៀតឈ្មោះ ទិត សុភា ថ្លែងថា ពេលយុវជនសួង នាគព័ន្ធត្រូវបានសមត្ថកិច្ចវាយ លោកព្យាយាមថតរូបភាព ក្រោយមកសមត្ថកិច្ចក៏វាយលោកដែរ ហើយយកទូរសព្ទលុបរួបភាពនោះចោល។ យុវជនទាំងពីរកំពុងស្វែងរកមធ្យោបាយដាក់ពាក្យបណ្តឹងលើករណីនេះ។
ជុំវិញបញ្ហានេះ វីអូឌី មិនទាន់អាចសាកសួរទៅប្រធានមណ្ឌលបោះឆ្នោត នៅវិទ្យាល័យ ជម្ពូវ័ន សមត្ថកិច្ចនៅសង្កាត់ចោមចៅ និង សមត្ថកិច្ចនៅខណ្ឌលពោធិ៍សែនជ័យ បាននៅឡើយ។