គណបក្សនយោបាយធំៗពីរ បានបង្ហាញលទ្ធផលនៃការបោះឆ្នោតថាខ្លួនមានកំណើនខ្ពស់រៀងៗខ្លួន ខណៈក្រុមអង្គការឃ្លាំមើលការបោះឆ្នោតបង្ហាញលទ្ធផលទាបជាងនេះ។
លោក ហ៊ុន សែន ប្រធានគណបក្សប្រជាជនកម្ពុជា បានអះអាងថា តាមតួលេខមិនទាន់ផ្លូវការ គណបក្សប្រជាជនទទួលបានចំនួន «៣ ៥២៩៤០០ សំឡេង ស្មើ៥១,៣៩% ដោយថាកើនឡើងជាង ៣០ម៉ឺនសំឡេង ធៀបនឹងការបោះឆ្នោតឆ្នាំ២០១៣»។
ចំណែកអ្នកនាំពាក្យគណបក្សសង្គ្រោះជាតិ លោក យឹម សុវណ្ណ ថ្លែងថា គណបក្សសង្គ្រោះជាតិដណ្តើមបានសំឡេងប្រមាណជា៤៦%នៅក្នុងការបោះឆ្នោតជ្រើសរើសក្រុមប្រឹក្សាឃុំសង្កាត់អាណត្តិទី៤។ នេះបើតាមលទ្ធផលបឋមនៃការរាប់សំឡេងឆ្នោតដោយគណបក្សនេះ។
លោក យឹម សុវណ្ណ ថ្លែងក្នុងសន្និសីទសារព័ត៌មាននៅទីស្នាក់ការគណបក្សសង្គ្រោះជាតិថា «លទ្ធផលបឋមនេះ នឹងធ្វើឲ្យគណបក្សសង្គ្រោះជាតិកើនសំឡេងពី៣០% នៅក្នុងការបោះឆ្នោតឆ្នាំ២០១២ទៅ៤៦% ក្នុងការបោះឆ្នោតឃុំ សង្កាត់ឆ្នាំ២០១៧»។
ចំណែកបន្ទប់ស្ថានការណ៍ដែលជាបណ្តុំអង្គការឃ្លាំមើលការបោះឆ្នោតវិញ បានកត់ត្រាថា គណបក្សប្រជាជនកម្ពុជាទទួលបានសំឡេងឆ្នោត៤៨% ពោលគឺនៅដដែលបើធៀបនឹងសំឡេងឆ្នោត២០១៣។ ចំណែកគណបក្សសង្រ្គោះជាតិទទួលបានសំឡេងឆ្នោត៤៥%ពោលកើនឡើង៥០ម៉ឺនសំឡេង បើធៀបនឹងសំឡេងឆ្នោតឆ្នាំ២០១៣។
បើតាមលទ្ធផលក្រៅផ្លូវការ គណបក្សប្រជាជនកម្ពុជាទទួលបានមេឃុំ សង្កាត់ចំនួន១១៥៨ ពោលធ្លាក់ចុះប្រមាណ២៧% ដែលគណបក្សកាន់អំណាចមួយនេះធ្លាប់កាន់កាប់មេឃុំ ចៅសង្កាត់ដល់១៥៩២ កាលពីឆ្នាំ២០១២។ ចំណែកគណបក្សសង្រ្គោះជាតិ អាចឈ្នះមេឃុំ ចៅសង្កាត់ប្រមាណ ៤៨៧ ពោលកើនឡើង១១១៧% ដែលកាលពីឆ្នាំ២០១២គណបក្សប្រឆាំងនេះកាន់កាប់មេឃុំ តែ៤០ប៉ុណ្ណោះ៕
