លោក ហ៊ុន សែន ជានាយករដ្ឋមន្ត្រីនិងជាប្រធានគណបក្សប្រជាជនកម្ពុជាអះអាងថា ការបោះឆ្នោតជ្រើសរើសក្រុមប្រឹក្សាឃុំសង្កាត់អាណត្តិទី៤ដែលប្រព្រឹត្តទៅកាលពីថ្ងៃអាទិត្យម្សិលមិញ គណបក្សរបស់លោកទទួលបានសំឡេងគាំទ្រដឹកមុខ ហើយថាមានចំនួនកើនឡើង បើប្រៀបធៀបនឹងឆ្នាំ២០១៣។
លោក ហ៊ុន សែន សរសេរនៅលើហ្វេសប៊ុករបស់លោកថា ទិន្នន័យមិនផ្លូវការដែលលោកទទួលបាន គឺពលរដ្ឋទៅបោះឆ្នោតទូទាំងប្រទេស មានចំនួន ៦ ៧៤៣ ៣២៩នាក់ ហើយថាក្នុងនោះ គណបក្សប្រជាជនកម្ពុជារបស់លោកទទួលបានសំឡេងគាំទ្របានចំនួន ៣ ៥២៩ ៤០០នាក់ ដែលស្មើនឹង ៥១,៣៩%។ លោកនាយករដ្ឋមន្ត្រីបញ្ជាក់ថា ចំនួនអ្នកគាំទ្រនៅពេលនេះ មានការកើនឡើង៣០ម៉ឺនសំឡេង បើប្រៀបធៀបការបោះឆ្នោតថ្នាក់ជាតិឆ្នាំ២០១៣។
លោកនាយករដ្ឋមន្ត្រី ហ៊ុន សែន អះអាងទៀតថា សំឡេងឆ្នោតពេលនេះ គឺមិនខុសគ្នាប៉ុន្មានជាមួយសំឡេងឆ្នោតនៅឆ្នាំ២០១៨ការបោះឆ្នោតថ្នាក់ជាតិនោះទេ។
ចំណែកគណបក្សសង្គ្រោះជាតិក៏អះអាងថា ខ្លួនទទួលបានការគាំទ្រច្រើនជាងអាណត្តិមុន គឺអាណត្តិមុន គណបក្សង្គ្រោះជាតិ ដែលមានការចូលរួមពីគណបក្ស សម រង្ស៊ី និងគណបក្សសិទ្ធិមនុស្សទទួលបានមេឃុំចៅសង្កាត់ចំនួន៤០ ប៉ុន្តែការបោះឆ្នោតម្សិលមិញមិញគឺបក្សនេះបង្ហាញថា ទទួលបានជាង៥០០មេឃុំ/សង្កាត់ស្នើនឹងប្រមាណ៤៦%។
ទោះយ៉ាងណា ការអះអាងថារបស់គណបក្សទាំងពីរ គឺជាលទ្ធផលដែលទទួលបានពីក្រុមការងាររបស់គណបក្សរៀងៗខ្លួនប៉ុណ្ណោះ មិនមែនចេញពីគណៈកម្មាធិការជាតិរៀបចំការបោះឆ្នោតនោះទេ៕