ប្រទេសអារ៉ាប៊ីសាអ៊ូឌីត បណ្ដាប្រទេសអារ៉ាប់ដទៃទៀត និងប្រទេសម៉ាល់ឌីវ បានប្រកាសកាត់ផ្ដាច់ទំនាក់ទំនងនឹងប្រទេសកាតាកាលពីថ្ងៃម្សិលមិញ ដោយកាត់ផ្ដាច់ទំនាក់ទំនងទាំងផ្លូវគោក ផ្លូវទឹក និងផ្លូវអាកាស ជាមួយប្រទេសសម្បូរប្រេងមួយនេះ ដែលជាមូលដ្ឋានកងទ័ពអាមេរិកដ៏ធំ ដោយចោទប្រកាន់ប្រទេសនេះថា បានគាំទ្រក្រុមភេរវកម្មនៅក្នុងតំបន់។ នេះដោយយោងតាមការផ្សាយរបស់ទីភ្នាក់ងារព័ត៌មាន AP។
បើតាមការចុះផ្សាយរបស់ AP ក្រៅពីដែនដីកោះម៉ាល់ឌីវ ប្រទេសបារ៉ែន អេហ្ស៊ីប អារ៉ាប៊ីសាអ៊ូឌីត អារ៉ាប់រួម និងប្រទេសយេមែន មិនបានទាមទារអ្វីពីប្រទេសកាតានោះឡើយ ខណៈដែលការសម្រេចចិត្តរបស់ពួកគេបាននាំឲ្យមណ្ឌលធ្វើដំណើរអន្តរជាតិមួយនេះ ធ្លាក់ចូលក្នុងវិបត្តិចលាចល និងបង្កឲ្យមានវិបត្តិកាទូតធំបំផុតនៅតំបន់ឈូងសមុទ្រពែក្ស ចាប់តាំងពីក្រោយសង្គ្រាមប្រឆាំងប្រទេសអ៊ីរ៉ាក់កាលពីឆ្នាំ១៩៩១។
ប្រទេសកាតា នឹងរៀបចំធ្វើជាម្ចាស់ផ្ទះព្រឹត្តិការណ៍ប្រកួតបាល់ទាត់ពិភពលោកនៅឆ្នាំ២០២២ និងជាមូលដ្ឋានកងទ័ពអាមេរិកប្រហែល ១ម៉ឺននាក់។ ប្រទេសនេះបានរិះគន់ការសម្រេចចិត្តបែបនេះថា ជាការរំលោភលើអធិបតេយ្យភាពរបស់ខ្លួន។ កាតាបានបដិសេធជាយូរមកហើយថា ខ្លួនមិនបានគាំទ្រក្រុមឧទ្ទាមបះបោរនោះទេ ហើយចាត់ទុកវិបត្តិនេះថា កំពុងឆាបឆេះដោយសារតែព័ត៌មានប្រឌិត ដែលកើតចេញពីទីភ្នាក់ងារព័ត៌មានរដ្ឋ ដែលកាតានិយាយថា ត្រូវបានគេហ៊ែកនាពេលថ្មីៗនេះ។
ចំណែកទីភ្នាក់ងារព័ត៌មាន Reuters វិញ បានចុះផ្សាយថា ការសម្រេចចិត្តនេះ បានប៉ះពាល់យ៉ាងធំធេងដល់ជើងហោះហើរនៅទូទាំងតំបន់អារ៉ាប់។ ប្រទេសអារ៉ាប៊ីសាអ៊ូឌីត បានហាមឃាត់ការហោះហើររបស់ក្រុមហ៊ុនអាកាសចរណ៍កាតាមិនឲ្យឆ្លងកាត់ដែនអាកាសរបស់ខ្លួន ខណៈដែលក្រុមហ៊ុនអាកាសចរណ៍ Etihad Airway និង Emirates Airline បាននិយាយថា ពួកគេបញ្ឈប់ជើងហោះហើរទាំងអស់ទៅកាន់ និងមកពីទីក្រុងដូហា ចាប់ពីព្រឹកថ្ងៃនេះរហូតដល់មានការជូនដំណឹងជាថ្មី។
កាតាគឺជាមណ្ឌលអាកាសចរណ៍ពិភពលោក ហើយអាកាសយានដ្ឋានជាច្រើននៅតំបន់ឈូងសមុទ្រពែក្ស សុទ្ធតែមានបណ្ដាញជើងហោះហើរអន្តរជាតិជាមួយប្រទេសកាតា៕