ក្រុមមន្ត្រីហ្វីលីពីននិយាយថា ពួកឧទ្ទាមឥស្លាមដែលគ្រប់គ្រងលើផ្នែកខ្លះនៃទីក្រុងម៉ារ៉ាវី នៅភាគខាងត្បូងហ្វីលីពីន បានត្រៀមខ្លួនសម្រាប់ការកាន់កាប់ទីក្រុងនេះរយៈពេលយូរ។ នេះដោយយោងតាមការចុះផ្សាយរបស់សារព័ត៌មាន BBC។
សារព័ត៌មានអង់គ្លេសមួយនេះចុះផ្សាយថា កម្លាំងសន្តិសុខកំពុងតែព្យាយាមបណ្ដេញពួកខ្មាន់កាំភ្លើងចេញ ចាប់តាំងពីពួកគេចាប់ផ្ដើមវាយប្រហារលើទីក្រុងនេះកាលពីពីរសប្ដាហ៍មុន។
ក្រុមមន្ត្រីយោធាបាននិយាយថា ពួកឧទ្ទាមកំពុងលាក់ខ្លួនតាមផ្លូវក្រោមដី និងតាមមូលដ្ឋាន ផ្ទុកទៅស្បៀងអាហារ និងអាវុធ។
ការវាយប្រយុទ្ធគ្នារវាងពួកឧទ្ទាម និងកងកម្លាំងសន្តិសុខ បានសម្លាប់មនុស្សយ៉ាងតិច ៧០នាក់ ក្នុងនោះមានទាំងជនស៊ីវិល ២០នាក់ ហើយអ្នកស្រុកជាង ១៨ម៉ឺននាក់ បានរត់ភៀសខ្លួនចេញពីលំនៅដ្ឋានរបស់ពួកគេ។
ជនស៊ីវិលរាប់រយនាក់ ត្រូវបានគេជឿថា កំពុងជាប់ផុងនៅក្នុងការប្រយុទ្ធគ្នារវាងកម្លាំងរដ្ឋាភិបាល និងពួកឧទ្ទាម ទាំងមានស្បៀងអាហារផ្គត់ផ្គង់តិចតួច។
កងកម្លាំងរដ្ឋាភិបាលដែលកំពុងធ្វើប្រតិបត្តិការវាយប្រហារតាមផ្លូវអាកាសនោះ បានអះអាងកាលពីដំបូងថា ខ្លួនបានទទួលជោគជ័យនៅក្នុងសមរភូមិ ប៉ុន្តែ មិនទាន់ដណ្ដើមបានទីក្រុងទាំងមូលមកវិញនៅឡើយទេ៕