ប្រទេសកាតា នៅថ្ងៃនេះបានថ្លែងវាយប្រហារការសម្រេចចិត្តរបស់ប្រទេសចំនួន ៤នៅតំបន់ឈូងសមុទ្រពែក្ស និងប្រទេសអេហ្ស៊ីប ដែលបានផ្ដាច់ទំនាក់ទំនងជាមួយខ្លួន ដោយថា ពួកគេពុំមានភាពយុត្តិធម៌ និងមានបំណងដាក់ក្រុងដូហា ឲ្យស្ថិតក្រោមអាណាព្យាបាលនយោបាយ។ នេះដោយយោងតាមការផ្សាយរបស់សារព័ត៌មាន Channel News Asia។
ក្រសួងការបរទេសកាតា បាននិយាយនៅក្នុងសេចក្ដីថ្លែងការណ៍មួយថា វិធានការទាំងនោះ មិនយុត្តិធម៌ទេ ហើយផ្អែកលើអំណះអំណាងគ្មានមូលដ្ឋាន និងខុសឆ្គង។ ក្រសួងកាតាបានលើកឡើងបែបនេះដោយសំដៅទៅដល់វិធានការដែលត្រូវបានប្រកាន់យកដោយប្រទេសអារ៉ាប៊ីសាអ៊ូឌីត បារ៉ែន អារ៉ាប់រួម យ៉ែមែន និងអេហ្ស៊ីប។
ក្រសួងការបរទេសកាតាបន្ថែមថា គោលបំណងរបស់ពួកគេច្បាស់លាស់ណាស់ គឺដើម្បីដាក់អាណាព្យាបាលលើរដ្ឋមួយ ដែលរំលោភទៅលើអធិបតេយ្យភាពរបស់កាតា៕
