រដ្ឋាភិបាលថ្មីរបស់កូរ៉េខាងត្បូង កាលពីថ្ងៃម្សិលមិញនេះ បានប្រកាសការបញ្ចូលកញ្ចប់ថវិកា ១០ពាន់លានដុល្លារទៅក្នុងជំនួយផ្នែកសុខមាលភាពសង្គម និងអនុវត្តតាមពាក្យសន្យារបស់ប្រធានាធិបតី លោក មូន ជែអ៊ីន ដែលបានសន្យាបង្កើតការងារ ៨១ម៉ឺនកន្លែងនៅក្នុងវិស័យសាធារណៈ។ នេះដោយយោងតាមការចុះផ្សាយរបស់ Reuters។
Reuters បានផ្សាយបន្តថា ប៉ុន្តែ គណបក្សប្រជាធិបតេយ្យកំពុងកាន់អំណាចរបស់លោក មូន កំពុងប្រឈមមុខនឹងបញ្ហាក្នុងការអនុម័តកញ្ចប់ថវិកាបន្ថែម ខណៈដែលគណបក្សនេះកាន់កាប់អាសនៈតែ ៤០ភាគរយ ក្នុងចំណោមអាសនៈ ២៩៩ នៅក្នុងសភាជាតិ ហើយនឹងត្រូវការការគាំទ្រពីសមាជិកសភាបក្សប្រឆាំងជាង ៣០រូបទៀត។
គណបក្សប្រឆាំងពីរនៅក្នុងសភាជាតិកូរ៉េខាងត្បូង បាននិយាយថា ការចំណាយលើវិស័យសុខមាលភាពសង្គមនេះ អាចនឹងមិននឹងនរទេ ហើយផែនការនេះ មិនស្របតាមលក្ខខណ្ឌច្បាប់នោះឡើយ។
ក្រសួងហិរញ្ញវត្ថុ បាននិយាយថា ការបញ្ចូលកញ្ចប់ថវិកាបន្ថែមនេះ នឹងត្រូវបែកចែក ៥.៤ពាន់ពាន់លានវ៉ុន សម្រាប់បង្កើតការងារនៅក្នុងវិស័យសាធារណៈ និងសេវាកម្មសង្គមកិច្ច ក្នុងនោះមានទាំងទីកន្លែងសម្រាប់ក្រុមពន្លត់អគ្គិភ័យ គ្រូបង្រៀន និងបុគ្គលិកប្រៃសនីយ៍។
ក្រសួងនេះបន្ថែមថា ចំណែកប្រាក់ ២.៣ពាន់ពាន់លានវ៉ុនទៀត នឹងត្រូវប្រើសម្រាប់ផ្ដល់ជំនួយសម្រាប់សម្រាកលម្ហែមាតុភាព និងមនុស្សចាស់ដែលត្រូវការការថែទាំសុខភាព៕
