សារព័ត៌មានអន្តរជាតិ បានចុះផ្សាយថា ប៉ូលិសបារាំងបានបាញ់បណ្ដាលឲ្យរបួសបុរសម្នាក់ ដែលបានប្រើញញួរវាយប្រហារលើមន្ត្រីម្នាក់នៅខាងក្រៅវិហារ Notre Dame នៅទីក្រុងប៉ារីស កាលពីយប់មិញនេះ ខណៈដែលបុរសរូបនោះ បានស្រែកថា “ការវាយប្រហារនេះសម្រាប់ប្រទេសស៊ីរី”។
ប្រភពមន្ត្រីប៉ូលិសបាននិយាយថា មន្ត្រីរូបនោះ បានរងរបួសបន្តិចបន្តួចនៅត្រង់ក ដែលការវាយប្រហារនេះបានកើតឡើងចំពេលដែលប្រទេសបារាំងស្ថិតក្នុងស្ថានភាពប្រុងប្រយ័ត្នខ្ពស់ ក្រោយពួកសកម្មប្រយុទ្ធបានសម្លាប់មនុស្ស ៧នាក់ នៅទីក្រុងឡុងដ៍ កាលពីថ្ងៃសៅរ៍សប្ដាហ៍មុន។
យោងតាមប្រភពស្និទ្ធនឹងការស៊ើបអង្កេត បានឲ្យដឹងថា ជនសង្ស័យ ក្រោយមកបានអះអាងថាជាទាហានព្រះនៃក្រុមរដ្ឋឥស្លាម។
ប៉ូលិសដែលជាមិត្តរួមការងារ បានបើកការបាញ់ប្រហារទៅលើបុរសនោះ ត្រូវចំត្រង់ទ្រូង ដួលនៅកន្លែងកើតហេតុ នៅបរិវេណវិហារមួយ ជាទីតាំងទាក់ទាញភ្ញៀវទេសចរណ៍បំផុតមួយនៅក្នុងប្រទេសបារាំង។
បុរសនោះបានដេកដួលហូរឈាមនៅលើដី ខណៈដែលប៉ូលិសបានដាក់របាំងបិទនៅទីនោះ និងស្វែងរកជនសមគំនិតដែលអាចមាន។
ប្រហែល ១ម៉ោងក្រោយមក ជនសង្ស័យរូបនោះត្រូវបានគេនាំទៅមន្ទីរពេទ្យ ហើយប៉ូលិសប្រកាសថា ស្ថានការណ៍ស្ថិតនៅក្រោមការគ្រប់គ្រងវិញហើយ៕
