ប្រទេសម៉ាឡេស៊ីនឹងចាប់ផ្ដើមអនុវត្តការដកហូតពន្ធលើវិស័យទេសចរណ៍ចាប់ពីថ្ងៃទី០១ ខែសីហាក្នុងឆ្នាំនេះ ដោយពន្ធមានតម្លៃចាប់ពី ០.៨ដុល្លារក្នុងមួយបន្ទប់សម្រាប់មួយយប់។ នេះដោយយោងតាមការផ្សាយរបស់សារព័ត៌មាន Channel News Asia ដែលបានឃើញខ្លឹមសារលម្អិតចុះផ្សាយនៅលើវេបសាយអគ្គនាយកដ្ឋានពន្ធដារប្រទេសម៉ាឡេស៊ី។
សារព័ត៌មានសិង្ហបុរីមួយនេះ ផ្សាយបន្តថា ការដកហូតពន្ធនេះ នឹងត្រូវប្រមូលយកពីអចលនទ្រព្យគ្រប់ប្រភេទ ដែលត្រូវបានគេប្រើប្រាស់ធ្វើជាកន្លែងស្នាក់អាស្រ័យសម្រាប់ភ្ញៀវទេសចរ លើកលែងតែការស្នាក់នៅតាមផ្ទះ និងការស្នាក់នៅតាមអគារដែលចុះបញ្ជីគ្រប់គ្រងដោយស្ថាប័នអប់រំ អគារប្រើប្រាស់សម្រាប់ការបណ្ដុះបណ្ដាល និងស្ថាប័នសាសនា ជាទីដែលអគារទាំងនោះមិនត្រូវបានប្រើប្រាស់សម្រាប់គោលបំណងពាណិជ្ជកម្ម។ ចំណែកអគារមានបន្ទប់ស្នាក់នៅតិចជាង ១០បន្ទប់ ក៏ត្រូវបានលើកលែងការដកហូតពន្ធផងដែរ។
រដ្ឋមន្ត្រីក្រសួងទេសចរណ៍ និងវប្បធម៌ម៉ាឡេស៊ី លោក មហាមេដ ណាស៊ី អាប់ឌុល អាហ្ស៊ីស បាននិយាយកាលពីខែមេសាថា នៅពេលច្បាប់នេះចូលជាធរមាន ចំណូលដែលបានមកពីពន្ធក្នុងវិស័យទេសចរណ៍ នឹងមានចំនួនប្រហែល ១៥៤លានដុល្លារ៕
