រលកនៃការដកសាច់ប្រាក់ដោយខុសច្បាប់ បានវាយប្រហារលើធនាគារដ៏ធំមួយរបស់ហ្វីលីពីន ដោយបង្កឲ្យមានក្ដីបារម្ភអំពីការហ៊ែកប្រព័ន្ធកុំព្យូទ័ររបស់ធនាគារ ខណៈដែលក្រុមមន្ត្រីក្រុមហ៊ុនបាននិយាយនៅថ្ងៃនេះថា វាគ្រាន់តែជាកំហុសបច្ចេកទេសកុំព្យូទ័រក្នុងក្រុមហ៊ុនតែប៉ុណ្ណោះ។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន AFP។
អតិថិជនធនាគារកោះហ្វីលីពីន BPI បានភ្ញាក់ផ្អើលនៅថ្ងៃនេះ ដោយមិនអាចចូលទៅក្នុងគណនីរបស់ពួកគេបានតាមអនឡាញ ដោយអតិថិជនជាច្រើនតក់ស្លុតយ៉ាងខ្លាំងនៅពេលបានឃើញដំណឹងថា មានការដក និងដាក់ប្រាក់ដោយខុសច្បាប់។
ធនាគារ BPI បាននិយាយក្នុងសេចក្ដីប្រកាសព័ត៌មានមួយថា បញ្ហានេះកើតចេញពីកំហុសដំណើរការទិន្នន័យខាងក្នុង ដែលត្រូវបានគេរកឃើញនិងស្ថិតក្រោមការដោះស្រាយ។
ប្រព័ន្ធដកហូតប្រាក់តាមអនឡាញ ត្រូវបានផ្អាក ប៉ុន្តែ សាខាធនាគារនៅតែបន្តបើក បើបីជាការដកហូតសាច់ប្រាក់ត្រូវចំណាយពេលយូរក៏ដោយ។
ទេសាភិបាលធនាគារកណ្ដាលហ្វីលីពីន បាននិយាយថា ពួកគេទទួលយកការពន្យល់របស់ធនាគារ BPI ថា គ្មានការហ៊ែកចូលប្រព័ន្ធកុំព្យូទ័រនោះឡើយ ប៉ុន្តែ ធនាគារនេះ នឹងនៅតែធ្វើការស៊ើបអង្កេតផ្ទាល់ថែមទៀត៕
