ការិយាល័យប្រធានាធិបតីកូរ៉េខាងត្បូង បាននិយាយនៅថ្ងៃនេះថា កូរ៉េខាងត្បូង នឹងផ្អាកការដាក់ពង្រាយខែលការពារមីស៊ីលអាមេរិកដ៏ចម្រូងចម្រាស់ រហូតទាល់តែការវាយប្រហារផលប៉ះពាល់បរិស្ថាន ដែលចេញបញ្ជាដោយប្រធានាធិបតីថ្មី ត្រូវបានគេធ្វើឡើងរួចរាល់។ នេះដោយយោងតាមការផ្សាយរបស់ទីភ្នាក់ងារព័ត៌មាន AFP។
ក្រុងសេអ៊ូលនៅក្រោមរដ្ឋបាលអតីតប្រធានាធីបតី អ្នកស្រី ផាក ហ្គឹនហេ កាលពីឆ្នាំមុន បានឯកភាពដាក់ពង្រាយប្រព័ន្ធស្កាត់ចាប់មីស៊ីលដ៏មានខ្លាំងក្លា ដើម្បីទប់ទល់ទៅនឹងការគំរាមកំហែងពីកូរ៉េខាងជើង ដែលមានអាវុធនុយក្លេអ៊ែរ បើទោះបីជាបង្កឲ្យក្រុងប៉េកាំងខឹងសម្បារក៏ដោយ។ ក្រុងប៉េកាំងបានចាត់ទុកការដាក់ពង្រាយខែលមីស៊ីលនេះ ជាការគំរាមកំហែងទៅលើសមត្ថភាពកងទ័ពរបស់ខ្លួន។
ជើងទម្របាញ់គ្រាប់មីស៊ីលចំនួន ២គ្រឿង ត្រូវបានគេដាក់ពង្រាយនៅភាគខាងត្បូងនៃស្រុកស៊ឹងជូ ជាទីដែលអ្នកស្រុករាប់រយនាក់បានផ្ទុះការតវ៉ាយ៉ាងបែកផ្សែងជុំវិញអ្វីដែលពួកគេមើលឃើញថា ជាការបង្កផលប៉ះពាល់បរិស្ថានកើតចេញពីអាគុយដែលគេប្រើនៅក្នុងប្រព័ន្ធខែលការពារមីស៊ីល។
មន្ត្រីជាន់ខ្ពស់ម្នាក់នៅឯការិយាល័យប្រធានាធិបតី បានប្រាប់អ្នកយកព័ត៌មានថា គ្មានការចាំបាច់ដកជើងទម្របាញ់គ្រាប់មីស៊ីលទាំងនោះ ដែលត្រូវបានគេដាក់ពង្រាយរួចហើយនោះទេ។
មន្ត្រីដដែលនេះ បានបន្ថែមថា ទោះជាយ៉ាងណា ការដាក់ពង្រាយប្រព័ន្ធការពារមីស៊ីលបន្ថែមទៀត គួរតែត្រូវបានធ្វើឡើងក្រោយពីមានការវាយតម្លៃលើផលប៉ះពាល់ផ្នែកបរិស្ថាន។
ការផ្អាកការដាក់ពង្រាយប្រព័ន្ធខែលការពារមីស៊ីលនេះ បានកើតឡើង ២ថ្ងៃក្រោយពីលោក មូន បានបញ្ជាឲ្យមានការស៊ើបអង្កេតទៅលើផលប៉ះពាល់ផ្នែកបរិស្ថាន ដើម្បីទទួលបានការគាំទ្រកាន់តែច្រើនពីមហាជនសម្រាប់គម្រោងនេះ៕