ប្រធានាធិបតីអាមេរិក លោក ដូណាល់ ត្រាំ នៅថ្ងៃនេះ បានជំរុញឲ្យមានឯកភាពនៅតំបន់ឈូងសមុទ្រពែក្ស ជាសារមួយដែលកើតឡើងតែប៉ុន្មានម៉ោងក្រោយពីលោកគាំទ្រប្រទេសអារ៉ាប៊ីសាអ៊ូឌីត និងការសម្រេចចិត្តរបស់សម្ព័ន្ធរបស់ខ្លួននៅក្នុងតំបន់នេះ ក្នុងការផ្ដាច់ទំនាក់ទំនងកាទូតជាមួយប្រទេសកាតា។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន AFP។
នៅក្នុងជំហរផ្លាស់ប្ដូរមួយ ប្រទេសអារ៉ាប៊ីសាអ៊ូឌីត អេហ្ស៊ីប អារ៉ាប់រួម និងបារ៉ែន បានប្រកាសកាលពីថ្ងៃចន្ទថា ពួកគេបានកាត់ផ្ដាច់ទំនាក់ទំនងកាទូត និងបិទផ្លូវអាកាស ផ្លូវគោក និងផ្លូងទឹកជាមួយប្រទេសកាតា។
ដោយបង្កឲ្យមានវិបត្តិធំបំផុតនៅក្នុងពិភពអារ៉ាប់នៅក្នុងរយៈពេលប៉ុន្មានឆ្នាំនេះ បណ្ដាប្រទេសទាំងនោះ បានចោទរដ្ឋសម្បូរប្រេងនៅឈូងសមុទ្រពែក្សថា បានគាំទ្រក្រុមជ្រុលនិយម និងរបៀបវារៈរបស់ប្រទេសអ៊ីរ៉ង់ ដែលជាសត្រូវធំរបស់រដ្ឋាភិបាលក្រុងរីយ៉ាដ។
លោក ត្រាំ បានហក់ចូលក្នុងវិវាទនេះភ្លាម ដោយបានបង្ហោះសារ ដែលជាសញ្ញាបង្ហាញនូវការគាំទ្រដល់កិច្ចខិតខំប្រឹងប្រែងឡោមព័ទ្ធប្រទេសកាតាឲ្យឯកោ បើទោះបីជាប្រទេសនេះជាមូលដ្ឋានកងទ័ពអាកាសអាមេរិកដ៏ធំនៅតំបន់មជ្ឈឹមបូព៌ាក៏ដោយ។
លោក ត្រាំ បានបង្ហោះសារថា បណ្ដាប្រទេសទាំងនេះ និយាយថា ពួកគេនឹងប្រកាន់ជំហរតឹងរឹងចំពោះការផ្ដល់មូលនិធិដល់ក្រុមជ្រុលនិយម ហើយប្រទេសទាំងនោះសុទ្ធតែចង្អុលទៅប្រទេសកាតា។ លោកបន្ថែមថា នេះប្រហែលជាចំណុចចាប់ផ្ដើមនៃទីបញ្ចប់របស់ចលនាភេរវកម្ម។
សេចក្ដីរាយការណ៍មួយរបស់ទូរទស្សន៍ CNN ក្រោយមកបានដកស្រង់សម្ដីរដ្ឋមន្ត្រីការបរទេសកាតា លោក មហាំមេដ ប៊ីន អាប់ឌុលរ៉ាម៉ាន់ អាល់ថានី ដែលបាននិយាយថា ក្រុមជំនាញការ FBI បានសន្និដ្ឋានថា ក្រុមចោរអ៊ីនថឹណិតរុស្ស៊ីបានលូកដៃក្នុងរឿងនេះ។
ប្រព័ន្ធផ្សព្វផ្សាយអាមេរិកមួយនេះ បាននិយាយថា ក្រុមមន្ត្រីចារកម្មអាមេរិកជឿថា ក្រុមចោរអ៊ីនថឹណិតរុស្ស៊ីបានបង្កើតរឿងមិនពិតមួយនៅលើទីភ្នាក់ងារព័ត៌មានរដ្ឋកាតា ដែលអាចជំរុញឲ្យមានការដាក់ទណ្ឌកម្មទៅលើប្រទេសកាតានាំមុខដោយប្រទេសអារ៉ាប៊ីសាអ៊ូឌីត៕