ប្រធានាធិបតីបារាំង លោក Emmanuel Macron នៅថ្ងៃពុធម្សិលមិញ បានជំរុញឲ្យមេដឹកនាំអារ៉ាប់ប៊ីសាអ៊ូឌីត អ៊ីរ៉ង់និងកាតា ភ្ជាប់ទំនាក់ទំនងគ្នាឡើងវិញ ហើយបើកការចរចាដោះស្រាយបញ្ហា វិបត្តិនៅឈូងសមុទ្រនោះ។
ការិយាល័យប្រធានាធិបតីបារាំងថ្លែងថា លោក Macron បានអញ្ជើញមេដឹកនាំនៃប្រទេសដែលកំពុងមានទំទាស់ការទូតទាំងនេះ បើកការចរចារួមគ្នាមួយ ដើម្បីស្វែងរកដំណោះស្រាយរួម។ នេះបើតាមទីភ្នាក់ងារព័ត៌មាន AFP។
កាលពីថ្ងៃចន្ទអារ៉ាប់ប៊ីសាអូឌីត រួមទាំងសម្ព័ន្ធមិត្តរួមមាន សហព័ន្ធអារ៉ាប់ បារេន និងអេហ្ស៊ីប ប្រកាសផ្តាច់ទំនាក់ទំនងការទូត ជាមួយកាតា ដោយចោទថា ប្រទេសកាតា ផ្តល់ឈូងសមុទ្រធ្វើជាមូលដ្ឋានរបស់ពួកភេរវកម្មដែលបំពានច្បាប់អន្តរជាតិ។ ទោះយ៉ាងណា ប្រទេសកាតា បានប្រកាសម្តងហើយម្តងទៀតថា ខ្លួនមិនបានធ្វើសកម្មភាពដូចការចោទប្រកាន់នោះទេ។
អារ៉ាប់ បានដឹកនាំសម្ព័ន្ធមិត្ត ដាក់ចេញផែនការហ៊ុំព័ទ្ធសេដ្ឋកិច្ចកាតា និង អំពាវនាវឲ្យរដ្ឋ និង ក្រុមហ៊ុនផ្សេងៗទៀតដាក់ទណ្ឌកម្មលើប្រទេសកាតាដូចគ្នានេះដែរ។
នៅថ្ងៃពុធម្សិលមិញ លោក Macron ជំរុញឲ្យប្រទេសដែលកំពុងមានជម្លោះទាំងនោះ បើកការចរចា ដើម្បីរួមគ្នា ប្រឆាំងសកម្មភាព និង កាត់ផ្តាច់ផ្នែកហិរញ្ញវត្ថុរបស់ពួកភេរវកម្ម៕