កូរ៉េខាងជើងបាញ់ប្រភេទមីស៊ីលកំទេចនាវានៅព្រឹកនេះ

កូរ៉េខាងជើង​បាញ់សាកល្បងជាថ្មីទៀតនៅថ្ងៃព្រហស្បតិ៍ នូវប្រភេទមីស៊ីលបាញ់ចេញពីដីគោក ទៅកំទេចនាវា ដែលការសាកល្បងចេញពីឆ្នេរសមុទ្រខាងកើត។​

កងទ័ពកូរ៉េខាងត្បូងអះអាងថា ប្រភេទមីស៊ីលដែលកូរ៉េខាងជើងបាញ់នៅថ្ងៃនេះ គឺជាប្រភេទល្បឿនលឿន ហើយជាការសម្ពាធថ្មីទៀត ដល់សន្តិសុខសណ្តាប់ធ្នាប់ពិភពលោក។ ​នេះបើតាមទីភ្នាក់ងារព័ត៌មានរ៉យទ័រ។​

ការបាញ់សាកល្បងនេះ ចាប់ផ្តើមធ្វើឡើង​មិនដល់មួយសប្តាហ៍ទេ ក្រោយពេល​អង្គការសហប្រជាជាតិបានដាក់ទណ្ឌថ្មីមួយទៀត ដែលជាការដាក់គំនាបលើកម្មវិធីអាវុធនុយក្លេអ៊ែរបស់កូរ៉េខាងជើង។​

ការិយាល័យចម្រុះរដ្ឋរបស់កូរ៉េខាងត្បូងថ្លែងថា ការបាញ់មីស៊ីលនៅព្រឹកនេះ គឺបានបាញ់ចេញពីឆ្នេរសមុទ្ររបស់កូរ៉េខាងជើងនៅក្នុងទីក្រុង Wonsan។​

ប្រធានាធិបតីកូរ៉េខាងត្បូង លោក Moon-Jae-in បានសង្ខេបពីព័ត៌មាននៃការបាញ់មីស៊ីលនេះ ប្រាប់សាធារណជន ហើយថា យោធារបស់កូរ៉េខាងត្បូងកំពុងតែតាមដានបន្ត។​ ការបាញ់នៅថ្ងៃព្រហស្បតិ៍នេះ ជាគ្រាប់មីស៊ីលកូរ៉េខាងជើងទី៤ ចាប់តាំងពីលោក Moon-Jae-in ចូលកាន់តំណែងកាលពីខែឧសភាមក៕