អ្នកឃ្លាំមើលសិទ្ធិមនុស្សអះអាងថា បុរសជាជនជាតិថៃម្នាក់ ត្រូវបានតុលាការយោធាក្នុងក្រុងបាងកកសម្រេចនៅថ្ងៃសុក្រនេះ ឲ្យជាប់ពន្ធនាគាររយៈពេល ៣៥ឆ្នាំ ដោយសារការបង្ហោះសាររិះគន់ក្សត្រនៅលើហ្វេសប៊ុកផ្ទាល់ខ្លួន។
តុលាការយោធាក្រុងបាងកក បានប្រកាសសេចក្តីសម្រេច ឲ្យបុរសម្នាក់អាយុ៣៤ឆ្នាំ ឲ្យជាប់ពន្ធនាគារ ដោយសារការបង្ហោះរូបភាពនិងវីឌីអូខ្សែរាជវង្ស ក្នុងន័យរិះគន់។ នេះបើតាមទីភ្នាក់ងារព័ត៌មាន AFP។
តាមច្បាប់របស់ថៃ គឺបុរសនោះប្រឈម ជាប់ពន្ធនាគារ៧០ឆ្នាំ ប៉ុន្តែមានការសម្រួលមកត្រឹម ៣៥ឆ្នាំ គឺឲ្យជាប់ពាក់កណ្តាលវិញ ដោយសារបុរសរូបនោះបានសារភាពទោសកំហុស។
នៅក្នុងប្រទេសថៃមានការដាក់គំនាបខ្លាំង ចំពោះការនិយាយ ឬ ការិះគន់លើក្សត្រ ឬ ខ្សែរាជវង្ស ហើយតែមានការកាត់ទោសឲ្យជាប់ពន្ធនាគារបន្តបន្ទាប់ចំពោះ ករណីនេះ៕