យោធាហ្វីលីពីន កាលពីថ្ងៃម្សិលមិញនេះ បានស្នើទៅក្រុមហ៊ុន Facebook ឲ្យបិទគណនីរាប់សិប ដែលមានទំនាក់ទំនងនឹងពួកបះបោរ ដែលបានវាយប្រហារទីក្រុងមួយនៅភាគខាងត្បូង ដោយថា គណនីទាំងនោះកំពុងត្រូវបានប្រើសម្រាប់ឃោសនា។ នេះដោយតាមការចុះផ្សាយរបស់ទីភ្នាក់ងារព័ត៌មាន AFP។
អ្នកនាំពាក្យយោធាហ្វីលីពីន លោក ចូ-អា ហេរ៉េរ៉ា បាននិយាយថា បណ្ដាញសង្គមរបស់កងទ័ព បានរកឃើញគណនីហ្វេសប៊ុកចំនួន ៦៣ ដែលជារបស់ក្រុមជ្រុលនិយម និងអ្នកនាំគាំទ្ររបស់ពួកគេ។
លោក ហេរ៉េរ៉ា បានថ្លែងក្នុងសន្និសីទកាសែតនៅទីក្រុងម៉ារ៉ាវីថា គណនី ៦៣ កំពុងតែចែកចាយព័ត៌មានពិសពុល និងព័ត៌មានមិនត្រឹមត្រូវ ដែលជះឥទ្ធិពលដល់ទិដ្ឋភាពព័ត៌មាន និងចិត្តគំនិតរបស់ពលរដ្ឋហ្វីលីពីនគ្រប់រូប។
លោកបន្ថែមថា យោធាបានស្នើទៅក្រុមហ៊ុន Facebook ហ្វីលីពីន ឲ្យអនុវត្តវិធានការចាំបាច់ ដើម្បីដកចោលគណនីក្លែងក្លាយទាំងនោះ៕
