ប្រទេសរុស្ស៊ីកាលពីថ្ងៃម្សិលមិញនេះ បានអំពាវនាវឲ្យមានការពិភាក្សាគ្នាដោះស្រាយជម្លោះរវាងប្រទេសកាតា និងប្រទេសជិតខាងនៅតំបន់ឈូងសមុទ្រពែក្ស ខណៈដែលរដ្ឋាភិបាលក្រុងរ៉យ៉ាដ និងសម្ព័ន្ធមិត្តរបស់ខ្លួន បានស្វាគមន៍ការទាមទាររបស់ប្រធានាធិបតីអាមេរិក លោក ដូណាល់ ត្រាំ ដែលបានទាមទារឲ្យរដ្ឋាភិបាលក្រុងដូហាបញ្ឈប់ការផ្ដល់ជំនួយទៅដល់ក្រុមជ្រុលនិយម។ នេះដោយយោងតាមការផ្សាយរបស់ AFP។
អង្គការលើកលែងទោសអន្តរជាតិ បានព្រមានអំពីភាពតានតឹង និងក្ដីបារម្ភទៅលើប្រជាជនធម្មតា ដែលបណ្ដាលមកពីជម្លោះការទូតនេះ។
ការអំពាវនាវរបស់រដ្ឋាភិបាលក្រុងម៉ូស្គូ បានកើតឡើងក្រោយពីរដ្ឋមន្ត្រីការបរទេសអាមេរិក លោក Rex Tillerson បានជំរុញទៅអារ៉ាប៊ីសាអ៊ូឌីត និងប្រទេសសម្ព័ន្ធមិត្តរបស់ខ្លួន ឲ្យកាត់បន្ធូបន្ថយការហ៊ុំព័ទ្ធផ្លូវទឹក និងផ្លូវគោកទៅលើប្រទេសសម្បូរប្រេងកាតា។
កាលពីថ្ងៃចន្ទកន្លងមកនេះ អារ៉ាប៊ីសាអ៊ូឌីត បារ៉ែន អេហ្ស៊ីប អារ៉ាប់រួម យ៉េមែន និងម៉ាល់ឌីវ បានកាត់ផ្ដាច់ទំនាក់ទំនងជាមួយប្រទេសកាតា ដោយបានចោទប្រទេសមួយនេះថា បានគាំទ្រចលនាភេរវកម្ម និងបានដាក់វិធានការពិន័យ៕