យន្តហោះដឹកអ្នកដំណើរមួយគ្រឿងរបស់ក្រុមហ៊ុន China Eastern បានជួបប្រទះនឹងកំហុសយ៉ាងធ្ងន់ធ្ងរ ដែលបណ្ដាលឲ្យម៉ាស៊ីនមួយគ្រឿងផ្ទុះឆេះ និងបង្ខំឲ្យចុះចតជាបន្ទាន់នៅទីក្រុងស៊ីដនី។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន AFP។
អ្នកដំណើរដែលភ័យតក់ស្លុតនឹងហេតុការណ៍នេះ បានរៀបរាប់ពីសំឡេងផ្ទុះដ៏ខ្លាំងក្លា ក្រោយពីយន្តហោះ MU736 បានហោះឡើងចេញពីព្រលានយន្តហោះទីក្រុងស៊ីដនី កាលពីថ្ងៃម្សិលមិញ ខណៈដែលបុគ្គលិកយន្តហោះនោះ បានសម្អាតកៅអីនៅជិតទីតាំងម៉ាស៊ីនមានបញ្ហា និងបានហោះត្រឡប់ក្រោយវិញ។ ប៉ុន្តែ គ្មាននរណាម្នាក់រងគ្រោះថ្នាក់នោះទេ។
អ្នកនាំពាក្យក្រុមហ៊ុនអាកាសចរណ៍ China Eastern បានប្រាប់អ្នកសារព័ត៌មានថា បុគ្គលិកលើយន្តហោះ បានសង្កេតឃើញស្ថានភាពខុសប្រក្រតីនៅលើម៉ាស៊ីនខាងឆ្វេង និងបានសម្រេចចិត្តត្រឡប់ទៅព្រលានយន្តហោះទីក្រុងស៊ីដនីភ្លាមៗ។ អ្នកនាំពាក្យក្រុមហ៊ុននេះបន្ថែមថា យន្តហោះនោះ កំពុងស្ថិតក្រោមការស៊ើបអង្កេត។
រូបភាពដែលបង្ហោះនៅលើបណ្ដាញសង្គម បានបង្ហាញនូវប្រឡោះដ៏ធំមួយនៅលើម៉ាស៊ីនមួយគ្រឿងនៃយន្តហោះ Airbus A330៕