អតីតរដ្ឋអាជ្ញាអាមេរិក លោក Preet Bharara បានទម្លាយឲ្យដឹងនៅថ្ងៃនេះថា លោកទទួលបានការទូរស័ព្ទចូលពីលោក ដូណាល់ ត្រាំ ជាបន្តបន្ទាប់ ក្រោយការបោះឆ្នោតកាលពីខែវិច្ឆិកាឆ្នាំមុន ដែលធ្វើឲ្យលោកពុំមានអារម្មណ៍ល្អសោះ ហើយលោកថា លោកត្រូវបានបញ្ឈប់ពីតំណែង ក្រោយពីបដិសេធលើកទូរស័ព្ទជាលើកទីបី។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន Reuters។
ថ្លែងតាមទូរទស្សន៍ ABC ក្នុងកិច្ចសម្ភាសជាលើកដំបូងក្រោយពីលោក ត្រាំ បណ្ដេញលោកពីតំណែងជារដ្ឋអាជ្ញាសហព័ន្ធប្រចាំនៅតំបន់ម៉ាន់ហាតាន់ កាលពីខែមីនាកន្លងមក លោក Bharara បាននិយាយថា លោកជឿថា ការទូរស័ព្ទរបស់លោក ត្រាំ ទៅរូបលោក បានរំលោភនឹងព្រំដែនធម្មតារវាងអំណាចប្រតិបត្តិ និងរដ្ឋអាជ្ញាស៊ើបអង្កេតរឿងក្ដី។
លោក Bharara បន្ថែមថា ប្រធានាធិបតី បារ៉ាក់ អូបាម៉ា មិនដែលទូរស័ព្ទទៅរូបលោកនោះឡើយនៅអំឡុងពេលលោកនៅកាន់តំណែង។
លោក Bharara ថ្លែងបែបនេះតែពីរបីថ្ងៃក្រោយពីអតីតមេ FBI លោក James Comey បានផ្ដល់សក្ខីកម្មនៅឯគណៈកម្មការសភា បន្ទាប់ពីលោក ត្រាំ បានស្នើសុំមេ FBI រូបនេះ ឲ្យទម្លាក់ចោលការស៊ើបអង្កេតលើអតីតជំនួយការលោក ត្រាំ គឺលោក Michael Flynn និងជុំវិញបញ្ហាទំនាក់ទំនងជាមួយរុស្ស៊ី៕