ប្រទេសកាតាត្រៀមខ្លួនចាំស្ដាប់ក្ដីកង្វល់របស់បណ្ដាប្រទេសនៅពិភពអារ៉ាប់ ដែលបានកាត់ផ្ដាច់ទំនាក់ទំនងកាទូត និងចំណងសេដ្ឋកិច្ច។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន Reuters ដែលបានដកស្រង់សម្ដីពីប្រទេសគុយវែត ដែលកំពុងព្យាយាមសម្របសម្រួលដំណោះស្រាយសម្រាប់វិបត្តិនេះ។
អារ៉ាប៊ីសាអ៊ូឌីត អេហ្ស៊ីប បារ៉ែន និងអារ៉ាប់រួម បានកាត់ផ្ដាច់ទំនាក់ទំនងជាមួយប្រទេសកាតាកាលពីសប្ដាហ៍មុន ដោយចោទប្រទេសនេះថា បានគាំទ្រពួកបះបោរឥស្លាម និងប្រទេសអ៊ីរ៉ង់ ប៉ុន្តែ រដ្ឋាភិបាលក្រុងដូហា បានច្រានចោលការចោទប្រកាន់នេះហើយ។
វិបត្តិកាទូតនេះ បានរំខានដល់ការធ្វើដំណើរ កាត់ផ្ដាច់ទំនាក់ទំនងគ្រួសារ ទំនាក់ទំនងពាណិជ្ជកម្ម និងបង្កឲ្យមានភាពចម្រូងចម្រាស់ក្នុងវិស័យធនាគារ និងពាណិជ្ជកម្ម។ វិបត្តិនេះក៏បង្កឲ្យមានការបែកបាក់គ្នារវាងប្រទេសសម្ព័ន្ធមិត្ត ដែលប្រយុទ្ធក្នុងសង្គ្រាម និងវិបត្តិនយោបាយនៅតាមបណ្ដាប្រទេសនានា ចាប់ពីលីប៊ី រហូតដល់យែម៉ែន។
ទីភ្នាក់ងារព័ត៌មានរដ្ឋគុយវែត KUNA បានដកស្រង់សម្ដីរដ្ឋមន្ត្រីការបរទេសគុយវែត លោក សាបាហ៍ អាល់ខាលីដ អាលសាបាហ៍ ដែលបាននិយាយថា គុយវែតបានបញ្ជាក់ពីភាពត្រៀមខ្លួនរបស់ប្រទេសកាតា ដើម្បីស្វែងយល់ពីថតភាពនៃភាពលំបាក និងក្ដីកង្វល់របស់បណ្ដាប្រទេសជិតខាង និងដើម្បីដោះស្រាយសន្តិសុខ និងស្ថេរភាពតំបន់។
គុយវែត ដែលនៅតែបន្តទំនាក់ទំនងជាមួយប្រទេសកាតា និងតែងតែដើរតួជាអ្នកសម្របសម្រួលក្នុងជម្លោះនៅក្នុងតំបន់នោះ បាននិយាយថា ខ្លួនចង់ដោះស្រាយជម្លោះនេះនៅក្នុងក្របខណ្ឌតំបន់ប្រកបដោយការឯកភាពគ្នា៕
