ក្រុមសមាជិកសភាកោះតៃវ៉ាន់ បានចាប់ផ្ដើមបង្កើតក្រុមថ្មីមួយ នៅថ្ងៃនេះ ដើម្បីជួយជំរុញលទ្ធិប្រជាធិបតេយ្យនៅទីក្រុងហុងកុង ជាការសម្រេចចិត្តមួយដែលហាក់ធ្វើឲ្យរដ្ឋាភិបាលក្រុងប៉េកាំងមិនសប្បាយចិត្ត នៅមុនការប្រារព្ធខួបលើកទី ២០ឆ្នាំនៃការប្រគល់ដែនដីនេះពីចក្រភពអង់គ្លេស ត្រឡប់ទៅឲ្យចិនវិញ។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន AFP។
កោះតៃវ៉ាន់ និងដែនដីទីក្រុងហុងកុង តែងតែបង្កឲ្យចិនមិនសប្បាយចិត្ត ដោយដែនដីទាំងនេះ ជួបប្រទះនឹងចលនាបាតុកម្មធំៗប្រឆាំងនឹងប្រទេសចិនកាលពីឆ្នាំ២០១៤។
ទំនាក់ទំនងរវាងក្រុងប៉េកាំង និងកោះតៃវ៉ាន់ កាន់តែអាក្រក់ថែមទៀត នៅក្រោមរដ្ឋបាលប្រធានាធិបតី អ្នកស្រី សៃ អ៊ឹងវ៉េន ដែលបានឡើងកាន់តំណែងកាលពីឆ្នាំមុន។
ក្រុងប៉េកាំងចាត់ទុកកោះតៃវ៉ាន់ជាផ្នែកមួយនៃទឹកដីរបស់ខ្លួនដែលនឹងត្រូវបង្រួបបង្រួមឡើងវិញ ហើយចិនចង់ឲ្យអ្នកស្រី សៃ ទទួលស្គាល់ថា ដែនដីកោះមួយនេះជាអាណាខេត្តមួយរបស់ចិន ប៉ុន្តែ អ្នកស្រីតែងតែបដិសេធ។
ចំណែកនៅឯទីក្រុងពាក់កណ្ដាលស្វយ័តហុងកុងឯណោះវិញ កំហឹងកើតចេញពីកង្វះកំណែទម្រង់នយោបាយ និងក្ដីបារម្ភថា សេរីភាពស្ថិតក្រោមការគំរាមកំហែងនោះ បាននាំឲ្យកើតឡើងនូវក្រុមនានា ដែលអំពាវនាវឲ្យមានឯករាជ្យភាពដាច់ចេញពីប្រទេសចិន។
ក្រុមថ្មីដែលមានសមាជិកសភា ១៨រូបរបស់កោះតៃវ៉ាន់ បាននិយាយថា ពួកគេចង់ជួយជំរុញប្រជាធិបតេយ្យនៅទីក្រុងហុងកុង ក្នុងនោះមានទាំងលោក ហួង គូឆាង ដែលជាមេដឹកនាំមួយរូបនៃចលនាផ្កាឈូករតន៍ និងបច្ចុប្បន្ននេះជាសមាជិកសភាមួយរូបនៅក្នុងគណបក្សអំណាចថ្មីនៅទីក្រុងហុងកុង៕
