ប្រធានាធិបតីអាមេរិក លោក ដូណាល់ ត្រាំ នៅថ្ងៃនេះ បានព្យាយាមបង្ខូចឈ្មោះអតីតមេ FBI លោក Jamese Comey ដោយចោទប្រកាន់លោកថាជាជនកំសាកក្នុងការទម្លាយអ៊ីម៉ែលឯកជន។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន AFP។
នៅក្នុងសារបែបមានកំហឹងបង្ហោះនៅព្រឹកថ្ងៃនេះ ប្រធានាធិបតីអាមេរិករូបនេះ បានចោទសួរចរឹតលក្ខណៈរបស់លោក Comey និងចោទសួរថា តើលោកបានរំលោភច្បាប់ឬទេ ក្នុងការទម្លាយកិច្ចសន្ទនារបស់ពួកគេ។
លោក Comey បានដឹកនាំការស៊ើបអង្កេតរបស់ FBI ទៅលើជំនួយការរបស់លោក ត្រាំ ជាច្រើនរូប និងទំនាក់ទំនងរបស់ពួកគេជាមួយរដ្ឋាភិបាលរុស្ស៊ី ដែលទីភ្នាក់ងារចារកម្មអាមេរិកនិយាយថា ពួកគេបានព្យាយាមលូកលាន់ក្នុងកិច្ចការបោះឆ្នោតកាលពីឆ្នាំ២០១៦ ក្នុងលក្ខណៈជួយដល់លោក ត្រាំ។ ក្រោយមក លោក Comey ត្រូវបានលោក ត្រាំ បណ្ដេញចេញពីតំណែង។
បន្ទាប់ពីការបណ្ដេញចេញមក លោក Comey បានទម្លាយព័ត៌មានលម្អិតគួរឲ្យភ្ញាក់ផ្អើលស្ដីពីជំនួបជាបន្តបន្ទាប់ជាមួយលោក ត្រាំ ដែលនៅក្នុងនោះ លោក ត្រាំ បានចោទសួរអំពី “ភក្តីភាព” របស់លោក Comey និងបាននិយាយថា លោក Comey បានពន្យាការស៊ើបអង្កេតទៅលើជំនួយការសន្តិសុខជាតិរបស់លោក ត្រាំ៕
