ប្រទេសប៉ាណាម៉ា បានសម្រេចកាត់ផ្ដាច់ទំនាក់ទំនងកាទូតជាមួយកោះតៃវ៉ាន់ហើយនៅថ្ងៃនេះ ហើយបានងាកទៅភ្ជាប់ចំណងកាទូតជាមួយរដ្ឋាភិបាលក្រុងប៉េកាំងវិញ ដោយបានទទួលស្គាល់គោលនយោបាយ “ចិនតែមួយ”។ នេះដោយតាមការចុះផ្សាយរបស់ទីភ្នាក់ងារព័ត៌មានអន្តរជាតិ។
ប្រទេសប៉ាណាម៉ាបានប្រកាសថា ដោយសារតែផលប្រយោជន៍ និងបំណងប្រាថ្នារបស់ប្រជាជននៃប្រទេសទាំងពីរ សាធារណរដ្ឋប៉ាណាម៉ា និងសាធារណរដ្ឋប្រជាមានិតចិន បានសម្រេចអនុញ្ញាតឲ្យគ្នាទៅវិញទៅមក ចាប់ពីថ្ងៃដែលឯកសារនេះបានចុះហត្ថលេខា ទទួលស្គាលទៅវិញទៅមក នូវការបង្កើតចំណងកាទូតក្នុងកម្រិតដាក់ទូតទៅវិញទៅមក។
បន្ទាប់ពីគាំទ្រកោះតៃវ៉ាន់ទាំងចម្រូងចម្រាស់អស់ជាច្រើនទសវត្សរ៍មក ប៉ាណាម៉ានៅពេលនេះបានទទួលស្គាល់ថា មានចិនតែមួយប៉ុណ្ណោះនៅលើពិភពលោក និងថា កោះតៃវ៉ាន់គឺជាដែនដីរបស់ចិនមិនអាចបំបែកបាន។
សេចក្ដីរបស់ប្រទេសប៉ាណាម៉ា បានបន្ថែមថា ទំនាក់ទំនងថ្មីជាមួយរដ្ឋាភិបាលក្រុងប៉េកាំង នឹងចាប់ផ្ដើមនៅថ្ងៃនេះ ហើយទំនាក់ទំនងជាមួយកោះតៃវ៉ាន់ នឹងបញ្ចប់ផងដែរ។
សេចក្ដីប្រកាសអំពីការកាត់ផ្ដាច់ទំនាក់ទំនងជាមួយកោះតៃវ៉ាន់ ហើយបង្កើតចំណងកាទូតជាមួយចិននេះ បានកើតឡើងក្រោយពីក្រុងប៉េកាំងបានចាប់ផ្ដើមការកសាងកំពង់ផែសម្រាប់ផ្ទុកកុងតឺន័រមួយកាលពីសប្ដាហ៍មុន ដោយមានទាំងរោងចក្រផលិតហ្គាសធម្មជាតិ នៅខេត្តខូឡុន ស្ថិតនៅភាគខាងជើងប្រទេសប៉ាណាម៉ា។
កោះតៃវ៉ាន់ ដែលត្រូវបានក្រុងប៉េកាំងចាត់ទុកជាអាណាខេត្តបំបែកខ្លួននោះ ត្រូវបានប្រទេសប្រហែល ២០ ទទួលស្គាល់នៅទូទាំងពិភពលោក ហើយបញ្ហាឋានៈរបស់ដែនដីកោះមួយនេះ បានងើបឡើងវិញ បន្ទាប់ពីការបោះឆ្នោតជ្រើសរើសលោក ដូណាល់ ត្រាំ ជាប្រធានាធិបតីថ្មីរបស់អាមេរិក៕