មេទ័ពកំពូលមួយរូបរបស់ហ្វីលីពីន បាននិយាយនៅថ្ងៃនេះថា ពួកបះបោរឥស្លាម កំពុងកាន់កាប់ទីក្រុងម៉ារ៉ាវីប្រហែល ២០ភាគរយ ដែលនេះជាការច្រានចោលទៅនឹងការអះអាងពីក្រុមរដ្ឋឥស្លាមថា ជនសកម្មប្រយុទ្ធរបស់ខ្លួនកំពុងគ្រប់គ្រង ២/៣ នៃទីក្រុងនេះ ក្រោយការប្រយុទ្ធគ្នាអស់រយៈពេល ៣សប្ដាហ៍។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន Reuters។
Reuters បានបន្តថា កាលពីសប្ដាហ៍មុន អ្នកនាំពាក្យយោធាហ្វីលីពីន បាននិយាយថា ពួកបះបោរ ដែលព្យាយាមកាន់កាប់ទីក្រុងម៉ារ៉ាវីកាលពីថ្ងៃទី២៣ ខែឧសភានោះ ត្រូវបានកងទ័ពរដ្ឋាភិបាលបណ្ដេញឲ្យដកថយ និងនៅបន្តកាន់កាប់ទីក្រុងមួយនេះមិនដល់ ១០ភាគរយផង។
ទីភ្នាក់ងារព័ត៌មានក្រុមរដ្ឋឥស្លាមអាមេគ បានប្រកាសថា ទាហានហ្វីលីពីនបានបរាជ័យទាំងស្រុង អំឡុងពេលព្យាយាមដណ្ដើមយកទីក្រុងនេះមកវិញ ដោយទាហានយ៉ាងតិច ២០០នាក់ បានស្លាប់ ហើយទាហានជាច្រើនទៀត បានរត់ចោលជួរ អំឡុងពេលវាយប្រយុទ្ធគ្នានោះ។
អ្នកនាំពាក្យយោធាហ្វីលីពីន លោកឧត្ដមសេនីយ៍ Restituto Padilla បានចាត់ទុកព័ត៌មានរបស់អាម៉េគថា ជាការឃោសនាពិតប្រាកដ។
ប្រជាជនស្ទើតែទាំងអស់ក្នុងចំណោលប្រជាជន ២សែននាក់នៅទីក្រុងម៉ារ៉ាវី បានភៀសខ្លួនចេញពីទីក្រុងនេះ បន្ទាប់ពីពួកបះបោរបើកការវាយប្រហារលើទីក្រុងនេះ ប៉ុន្តែ យោធារដ្ឋាភិបាលហ្វីលីពីននេះ ជឿថា ជនស៊ីវិលប្រហែល ៥០០ ទៅ ៦០០នាក់ កំពុងជាប់ផុង ឬត្រូវចាប់ជាចំណាប់ខ្មាំង៕